Praces u 2010 h. nad lidarami hrupoŭki: Aleh Čyrkoŭ (Źjan), Hienadź Biarezin (Pažarnik), Viačasłaŭ Licenštejn (Licen).
U 1990-ch hrupoŭka «kryšavała» ŭvieś Homiel. Paśla ich nakryli siłaviki. I ŭ siaredzinie 2000-ch adpravili za kraty. Praŭda, nie ŭsim admierali vialikija terminy. Chto atrymaŭ ad 3 da 8 hadoŭ, paśpieli adlažać baki na narach i vyjści na svabodu. Z prahaj dziejnaści — złačynnaj. Za hetuju vosień byłyja «pažarniki» paśpieli ŭžo trojčy adznačycca ŭ kryminalnych chronikach.
20 vieraśnia na adnym ź leciščaŭ pad Homielem prahučaŭ vybuch. Paźniej śledčyja vyśvietlili, što takim čynam haradžanin chacieŭ pravučyć byłoha kampańjona pa biznesie — adbić u jaho hrošy.
Kryminalnuju spravu zaviali pa «chulihancy». 42-hadovy padazravany aryštavany.
Pry pieratrusie ŭ jaho domie znajšli pistalet-kulamiot «Agram-2000» z hłušycielem i patronami. A taki arsienał dadaŭ da bahažu jašče adnu spravu — pa niezakonnych dziejańniach z ahniastrelnaj zbrojaj.
Druhi padzielnik pa hrupoŭcy paśla vyzvaleńnia taksama viarnuŭsia da raniejšaha: skałaciŭ hrupu ź dzieviaci čałaviek i «kryšavaŭ» handlaroŭ spajsami.
Asnoŭnyja fihuranty spravy — maładyja ludzi 22—24 hadoŭ. Schiema była prostaja: pakunak psichatropnaha rečyva pradavali za 200 tysiač rubloŭ, ź jakich čverć atrymlivaŭ handlar, astatniaje asiadała ŭ rukach hrupoŭki. Z adnaho takoha handlara «kryša» atrymlivała kala 10 miljonaŭ u miesiac. A chto nie pahadžaŭsia tak pracavać — nie cackalisia: u tradycyjach 90-ch vyvozili ŭ les i prystaŭlali da skroni pistalet. Tut užo nie pahadzicca było składana. Ale i ich sprava ŭžo nakiravana ŭ sud.
Jašče adzin «pažarnik» adznačyŭsia ŭ Rečycy, u składzie arhanizavanaj hrupoŭki, jakaja zajmałasia machlarstvam.
Kryminalnaja sprava tolki rychtujecca da pieradačy ŭ sud, ale ŭžo viadomyja niekatoryja akaličnaści. Žychar Rečycy zajmaŭsia turystyčnym biznesam i vyrašyŭ nabyć novy aŭtobus. Vypadkovyja znajomyja paabiacali dapamohu i pierakanali kamiersanta pieradać im $22 tysiačy. Nieŭzabavie pradprymalniku paviedamili, što tych hrošaj dla dobraha aŭtobusa nie chapaje. Prapanavali ŭ pazyku $10 tysiač. Toj pahadziŭsia, a ŭhodu zamacavali nataryjalna. Ale ni hrošaj, ni aŭtobusa biznesoviec nie ŭbačyŭ. Paśla ŭžo pačaŭsia pošuk machlaroŭ, zatrymali ich pa darozie ŭ Rasiju. Mierkavali tam adsiadziecca. Bałazie, miescy dla ich znajomyja: akurat na abšarach Rasii i vyłoŭlivali padčas rasśledavańnia ŭ pačatku dvuchtysiačnych «pažarnikaŭ».
* * *
«Pažarniki» — samaje bujnoje ŭ sučasnaj historyi Homiela kryminalnaje farmiravańnie, jakoje ŭ siaredzinie 1990-ch naličvała da 100 maładych ludziej va ŭzroście ad 20 da 25 hadoŭ. Pa materyjałach abvinavačańnia, arhanizacyju ŭznačalili troje žycharoŭ abłasnoha centra (Źjan, Licen, Pažarnik). Na praciahu dziesiaci hadoŭ jany zajmalisia rekietam pradprymalnikaŭ, kantralavali prastytutak, valutčykaŭ, taksistaŭ. Na ich rachunku kala sta ciažkich złačynstvaŭ, u tym liku zhvałtavańni, rabavańni, machlarstva, padpał.
Sudy nad «pažarnikami» prachodzili ŭ Homieli ŭ 2004—2010. U 2010 da 17 i 19 hadoŭ pazbaŭleńnia voli byli prysudžanyja lidary hrupy, jakich zatrymali ŭ Maskvie. Jašče kala paŭsotni čałaviek pasadzili na terminy ad 3 da 16 hadoŭ.
Maštabnaja kryminalnaja dziejnaść «pažarnikaŭ» stała mahčymaj pry biaździejnaści kiraŭnikoŭ pravaachoŭnych orhanaŭ vobłaści.
Niekatoryja z supracoŭnikaŭ prakuratury i UUS stajali na zabieśpiačeńni ŭ bandytaŭ. Naprykład, načalnik kryminalnaha vyšuku byŭ asudžany potym da 18 hadoŭ pazbaŭleńnia voli, jašče niekatoryja apieratyŭniki — da mienšych terminaŭ.
