Biełaruś i Abjadnanyja Arabskija Emiraty ŭ 2015 hodzie pavinny vyjści na abjom dvuchbakovaha handlu ŭ $500 młn, što stanie asnovaj dla dalejšaha naroščvańnia supracoŭnictva.
Pra heta zajaviŭ Alaksandr Łukašenka 29 kastryčnika na sustrečy z namieśnikam savietnika nacyjanalnaj biaśpieki AAE šejcham Tachnunam bien Zaidam al-Nachajanam, paviedamlaje pres-słužba prezidenta.
Łukašenka, jaki znachodzicca z rabočym vizitam u AAE, padkreśliŭ, što paśla viartańnia ŭ Biełaruś daść daručeńnie ŭradu nieadkładna sfarmiravać hrupu tavaraŭ, u jakich majuć patrebu AAE, kab abaviazkova ŭ nastupnym hodzie vyjści na abjom tavaraabarotu ŭ $500 młn. «My b vielmi chacieli, kab padobnym čynam pastupiŭ i emiracki bok», — skazaŭ jon.
Pavodle słoŭ Łukašenki, «my pavinny abaviazkova dasiahnuć hetaha abjomu tavaraabarotu dla taho, kab stvaryć asnovu, peŭnuju handlova-ekanamičnuju placoŭku dla našaha dalejšaha supracoŭnictva».
«My ŭmiejem rabić usio, u čym maje patrebu vaša kraina, vy majecie toje, što patrebna nam, i chaciełasia b, kab my abjadnali patencyjały i pašyryli i pahłybili našy adnosiny jak u śfiery ekanomiki, biaśpieki, tak i inšych śfierach našych adnosin», — skazaŭ jon.
Łukašenka taksama padkreśliŭ, što jość adna prośba, kab tyja damoŭlenaści, jakich dasiahnuli na takim vysokim uzroŭni, abaviazkova efiektyŭna i ŭ mahčyma karotki termin byli realizavanyja. «My vielmi raźličvajem, što našy intensiŭnyja abmieny vizitami na samym vysokim uzroŭni i na ŭzroŭni ministraŭ, inšych słužbovych asob pryviaduć da vielmi surjoznych zruchaŭ u našych adnosinach», — adznačyŭ jon.
U svaju čarhu šejch Tachnun bien Zaid al-Nachajan zaznačyŭ, što šejch Muchamied bien Zaid al-Nachajan byŭ zadavoleny sustrečaj z Łukašenkam i ŭražany adkrytaściu hutarki. «Liču, što ŭčora ŭ našych adnosinach adbyŭsia, možna skazać, praryŭ», — padkreśliŭ jon.
«Jak ja razumieju, my ŭrešcie pierakanali našych partnioraŭ u Emiratach, što my da vas pryjšli surjozna i chočam pabudavać našy adnosiny na vielmi doŭhuju pierśpiektyvu», — adznačyŭ Łukašenka.
Kamientary