U Nacyjanalnym mastackim muziei Biełarusi adkryłasia vystava słuckich pajasoŭ, jakaja prachodzić u miežach Dziaržaŭnaj prahramy adradžeńnia staradaŭniaha majsterstva tkactva.
U ekspazicyi pradstaŭlena šeść pajasoŭ Słuckaj manufaktury z najbahaciejšych kalekcyj Nacyjanalnaha muzieja ŭ Varšavie. Zbor muzieja naličvaje trysta kuntušovych pajasoŭ, ź jakich 58 — słuckija. Piać pajasoŭ na vystavie vykanany ŭ pieryjad, kali pradpryjemstvam kiravali Jan i Lavon Madžarskija (1767—1807), adzin pojas stvorany paśla 1807 hoda. Pajasy byli nabytyja muziejem u pryvatnych asob u 1940—1960-ja hady.
Kuntušovy pojas — abaviazkovy aksiesuar mužčynskaha paradnaha kaściuma šlachty Rečy Paspalitaj, vysoki ŭzor ručnoha tkactva. Pa-majstersku vykananyja šedeŭry stvaralisia na praciahu siaredziny XVIII — pieršaj pałovy XIX stahodździa na manufakturach, samaj viadomaj ź jakich była Słuckaja; nasili ich zvyčajna pavierch kuntuša — vierchniaj vopratki z razrezanymi spuščanymi rukavami.
Kuntušovyja pajasy — unikalnaja źjava nacyjanalnaj mastackaj kultury. Raźvity mastacki hust, pryrodnaje adčuvańnie koleru, svojeasablivaja vytančanaja arnamientyka, kampazicyjnaja harmonija kuntušovych pajasoŭ staviać ich u adzin šerah z samymi vysokimi dasiahnieńniami suśvietnaj mastackaj kultury.
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary