U Biełarusi dziejničaje siekta «Śviatoj Rusi»

U «Našu Nivu» źviarnuŭsia zaniepakojeny čytač z Pastavaŭ. Jon dasłaŭ u Redakcyju skany dziŭnych ulotak, u jakich było ŭsio: Pucin, kosmas i Vialikaja Ruś.

«Hetyja ŭlotki i hazietu «Otkrovienije» pryniesła mnie maci. Pa jaje słovach, ahitpradukcyju razdavali 9 listapada na miascovym kirmašy, — paviedamiŭ Dźmitryj. — Rabili heta dźvie žančyny, pryčym adna razdavała ŭlotki, a druhaja fatahrafavała praces».

Vyśvietliłasia, što takim čynam rekłamujecca «Obŝierośsijskoje obŝiestviennoje dvižienije sodiejstvija duchovnomu raźvitiju nasielenija «Za Hosudarstviennosť i Duchovnoje vozroždienije Śviatoj Rusi».

Hetaja supołka zarehistravana na terytoryi Rasiejskaj Fiederacyi jak niekamiercyjnaje abjadnańnie. Sama pa sabie jana niešta siaredniaje pamiž patryjatyčnaj arhanizacyjaj i relihijnaj siektaj. Uznačalvaje ruch Leanid Masłaŭ — doktar techničnych navuk, były daradca Ekanamičnaha ŭpraŭleńnia Administracyi prezidenta RF, daradca Staršyni praŭleńnia «Hazprombanka» i vykładčyk u karparatyŭnym instytucie «Hazproma» i Vyšejšaj škole ekanomiki. Ale ciapier Masłaŭ zaniaty bolš važnaj spravaj: paviedamlajecca, što z 26 žniŭnia i pa siońnia jon atrymlivaje dyktoŭki ad vyšejšaha Kaśmičnaha rozumu, jaki taksama nazyvajecca i «Ajcom Niabiesnym», i navat «Bijakampjutaram». Varta adznačyć, što, zhodna z Masłavym, mienavita jahony «Ajciec» jašče i stvaryŭ internet. 

Va ŭlotkach, jakija napisany biurakratyčnaj movaj, pobač z partretam Pucina i cytatami jak samoha rasiejskaha prezidenta, tak i Vanhi z Nastradamusam, paviedamlajecca ab «misii słavianskich narodaŭ» i «farpoście duchoŭnaha adradžeńnia čałaviectva», jakim, viadoma, źjaŭlajecca Rasija.

Pa viersii Masłava, zaraz idzie fazavy pierachod: Ziamla pierachodzić na bolš vysoki ŭzrovień vibracyj, i, kaniečnie, pierajści razam ź joj zmohuć tolki tyja, chto prysłuchoŭvajecca da Kaśmičnaha rozumu. Dla hetaha taksama nieabchodna duchoŭna abjadnacca. Biełaruś i Ukraina — heta niepadzielnaja Śviataja Ruś, śćviardžajecca va ŭlotkach, i, kali ŭsie narešcie abjadnajucca, rasiejski narod paviadzie za saboj usio čałaviectva.

Kab daviedacca, što patrabujecca ad patencyjnych kandydataŭ u klijenty Kaśmičnaha rozumu, ja patelefanavaŭ pa numarach, jakija byli na ŭlotkach. Žančyna, jakaja nazvałasia Luboŭju Uładzimiraŭnaj Kuźminoj, majmu zvanku vielmi ŭzradavałasia. Vyśvietliłasia, što jana ŭdzielnica viciebskaha «filijała» ruchu. Padobnyja supołki, achvotna raskazała jana, isnujuć pa ŭsioj Biełarusi.

Nazyvajučy mianie «soniejkam», žančyna ŭ pieršuju čarhu pacikaviłasia, adkul ja pra ich daviedaŭsia. Pačuŭšy, što ja «atrymaŭ ulotku ŭ Pastavach», jana litaralna pryjšła ŭ zachapleńnie: «Cudoŭna!!!»

Pa jaje słovach, ad udzielnikaŭ ruchu amal ničoha nie patrebna. Hrašovyja vydatki minimalnyja — sama Kuźmina nabyvaje haziet i ŭletak, jakija razdaje, prykładna na 50 000 biełaruskich rubloŭ na miesiac. Hałoŭnaje, što patrabujecca ad patencyjnaha kandydata, heta być hatovym da ŭnutranaha rostu i samaŭdaskanaleńnia. Pryčym udzielnikam ruchu (Kuźmina nastojvała, što jany nie siekta i nie carkva) naviedvać chramy nichto nie zabaraniaje. Bo Chrystos, pa jaje vyrazach, byŭ «aniołam vysokich vibracyj», jakoha čałaviectva —«nizkavibracyjnaje» na toj momant — nie pryniało.

Cikava, što, pa jaje słovach, miascovyja ŭłady arhanizacyi nie zaminajuć. Nie tak daŭno — 18 kastryčnika — jany biez usiakich pieraškod praviali svoj «Sabor Śviatoj Rusi» ŭ Viciebskaj abłasnoj biblijatecy imia Lenina. Udzielničała ŭ im kala 50 čałaviek.

«Damovilisia z Taćcianaj Mikałajeŭnaj, jakaja niadaŭna stała dyrektarkaj, i arandavali aktavuju zału na druhim paviersie, — skazała Kuźmina. — A jašče raniej taki ž sabor pravodziŭsia ŭ Centralnaj haradskoj biblijatecy imia Horkaha».

U svaju čarhu kiraŭnictva biblijateki imia Lenina kateharyčna admoviłasia ad taho, što ŭ ich pravodziŭsia hety «sabor». Spačatku dyrektar Taćciana Adamian nastojvała, što ni pra jaki ruch jana nie viedaje, i kazała, kali heta ŭsio ž zdaryłasia, to praz damoŭlenaści ź minułym dyrektaram.

Što ž tyčycca Lubovi Kuźminoj, to jana ŭpeŭniena i apantana raskazała pra ŭsiebakovuju padtrymku ruchu.

«Na Dažynkach my pracavali ź milicyjaj. Jany ŭsio viedajuć pra nas, — paviedamiła maja surazmoŭca. — Ja sama niekalki hadoŭ tamu dasłała našyja infarmacyjnyja materyjały ŭ rezidencyju Łukašenki. I, jak paviedamiŭ naš kiraŭnik Masłaŭ, kamanda Łukašenki padziakavała za ich — skazali, što Alaksandr Ryhoravič čytaje «Otkrovienije».

Uvohule, pa słovach Kuźminoj, ruch padtrymlivaje i patryjarch Kiryła, jaki taksama vykazvaŭ padziaki (znoŭ ža, tak raskazaŭ svaim prychilnikam Masłaŭ). Dy i Pucin na ŭletkach znachodzicca mienavita tamu, što «taksama rezaniruje, taksama va ŭnison». Što ž tyčycca maich sumnieńniaŭ nakont abjadnańnia Biełarusi sa «Śviatoj Ruśsiu», to Luboŭ Uładzimiraŭna paabiacała, što ja potym sam usio zrazumieju.

Za paŭhadziny našaj hutarki Kuźmina paviedamiła mnie šmat dzivosaŭ: i pra toje, što ŭsie my hipierbarei, i pra źziańnie, jakoje vychodziła ź jaje dyjafrahmy… Ale boh — ci Kaśmičny rozum — ź joj!

Bolš cikavić nie hetaje, a toje, što davoli nieadnaznačnaja arhanizacyja zastajecca biez uvahi ŭładaŭ, u adroźnieńnie ad tych ža hramadskich aktyvistaŭ ci niezaležnych ŚMI. Pasprabujcie razdavać ulotki ab pravach čałavieka, pabačycie, praź jaki čas vami zacikavicca milicyja. A pra Kaśmičny rozum — kali łaska. Moža, i praŭda ŭsia sprava ŭ vibracyjach?

• 0
• 0
• 0
• 0
• 0
• 0
• 0
• 0