Ekołah raskrytykavaŭ prajekt śvinakompleksu pad Maładziečnam: Štodzień na pali buduć vylivać pa 12 cystern žyžy

U spravazdačy ab acency ŭździejańnia śvinakompleksu ŭ Mojsičach Maładziečanskaha rajona na navakolnaje asiarodździe jon ukazvaje na pamyłki ŭ padlikach i niedakładnaści. Samoj mietadałohii, formuł, pa jakich rabili acenku, nie pryviedziena. Z-za hetaha pierapravieryć ekśpiertaŭ faktyčna niemahčyma.

Ekołah patłumačyŭ asnoŭnyja niedachopy spravazdačy pry ŭmovie ananimnaści.

Jon praličyŭ vykidy amijaku pa ahulnapryniataj u Biełarusi mietodycy, prapisanaj u dapamožniku ŭ halinie achovy navakolnaha asiarodździa i pryrodakarystańnia 17.08-01-2012. Jon uziaŭ tolki adnu krynicu niearhanizavanych vykidaŭ – hnajaschovišča (pad №6034, st.245-246, «Acenka ŭździejańnia na navakolnaje asiarodździe» śvinakompleksu ŭ Mojsičach).

I ŭbačyŭ, što ličby vykidaŭ, pryviedzienyja ŭ prajekcie, zanižanyja. A takich krynic 39, i pamyłak moža być našmat bolš. Pytańnie: jakoj mietodykaj karystalisia prajektanty ŭ spravazdačy, kali źjaŭlajucca takija raźbiežki?

Pavialičyć

Kolki na samoj spravie budzie hnoju?

U acency prapisana, što za sutki sa śvinahadoŭčaha kompleksu na 100 tysiač śvińniaŭ budzie vydzialacca 10 ton hnoju. Heta značyć, 100 hram ad kožnaj śvińni.

Kali adkryć rasijskija mietadyčnyja rekamiendacyi (rekamiendacyjnyja dakumienty, mietadyčnyja rekamiendacyi pa technałahičnym prajektavańni sistem vydaleńnia i padrychtoŭki da vykarystańnia hnoju i pamiotu ad 1.10.15.02-08) pa prajektavańni śvinakompleksaŭ, tam praduhledžana, što adna śvińnia moža davać da 4,5 kiłahrama hnoju ŭ dzień.

Adpaviedna, maksimalnaja kolkaść hnoju ad takoha ž śvinakompleksu ŭ Rasii ŭ 45 razoŭ bolšaja i dasiahaje 450 ton hnoju ŭ dzień.

Śćviardžać, što sapraŭdnaja kolkaść hnoju bolšaja ŭ 45 razoŭ, nie varta. Jość chibnaść, bo ŭziaty maksimum. Ale toje, što z kompleksu budzie vydzialacca 10 ton hnoju ŭ dzień, vyklikaje sumnievy.

Technałohii tannyja i nie sučasnyja

Na dumku ekśpierta, prajekt nie adpaviadaje času. Na sučasnych śvinakompleksach vykarystoŭvajuć novyja technałohii ŭ śfiery žyviołahadoŭli. Jany dapamahajuć maksimalna źmienšyć niehatyŭnaje ŭździejańnie na navakolle.

Naprykład, čamu dla kampastavańnia hnoju nie praduhledžanaje pravieranaje hadami burtavańnie? Kali źvierchu hnoj prykryvajuć 20-santymietrovym płastam ziamli ci torfu. U takoj schiemie ŭ atmaśfieru vyłučajecca mienš zabrudžvalnych rečyvaŭ, a bijatermičnyja pracesy iduć lepš.

U prajekcie ž idzie havorka, što prosta buduć źbirać hnoj i vyvozić na pali. Čamu nie praduhledžanaje budaŭnictva bijahazavych ustanovak i mietatenkaŭ? Dziakujučy im možna było b atrymać haz, jaki moh by zabiaśpiečvać enierhijaj śvinakompleks ci damy.

Prajekt ža, jaki padrychtavali homielskija śpiecyjalisty, tanny. Technałohii, što płanujuć vykarystoŭvać, sastarełyja. Adpaviedna im uździejańnie našmat bolš niehatyŭnaje, čym mahło b być.

Pra pach ni słova

Maładziečancy najbolš bajacca, što ŭ horadzie budzie śmiardzieć. Adnak smurod nijak nie narmujecca. Niama dakumientaŭ, jakija praduhledžvali b jaho abmiežavańnie. Paźbiehnuć ža jaho pry takim hihanckim śvinakompleksie i vielizarnaj kolkaści adkidaŭ možna, tolki vykarystoŭvajučy sučasnyja, ale zatratnyja technałohii.

Tym časam u spravazdačy nie zaprajektavanyja nijakija mierapryjemstvy i srodki jaho źmianšeńnia, jakija viadomyja suśvietnaj praktycy.

Śpiecyjalist tłumačyć, što, jak pakazvaje praktyka, najbolšy smurod źjaŭlajecca padčas taho, jak unosiać hnoj u hlebu i palivajuć paletki hnajavoj žyžaj.

Paźbiehnuć niepryjemnych pachaŭ možna było b, vykarystoŭvajučy pierapracoŭku čarviakami ćviordaha hnoju. Tady b pach nie ŭźnikaŭ padčas raźmierkavańnia kampostu pa paletkach. Heta prajektam nie praduhledžana.

Kompleks u Mojsičach chočuć pabudavać u troch kiłamietrach ad horada. Da navakolnych viosak adlehłaść jašče mienšaja.

U spravazdačy prapisana, što vioska Rajeŭščyna ŭvachodzić u sanitarna-achoŭnuju zonu kompleksu, a heta niedapuščalna. Pra heta prama havorycca ŭ samoj acency.

Akramia Rajeŭščyny, pobač znachodziacca vioski Mojsičy, Adamavičy i Rahazy.

Try miesiacy buduć palivać pali žyžaj

Ubačyć miežy paletkaŭ, pa jakich buduć raźmiarkoŭvać hnoj, niemahčyma. U spravazdačy hetaha niama, tolki ličby. 55 hiektaraŭ pryznačanyja dla zavorvańnia ćviordaha hnoju. Jašče 12 hiektaraŭ – dla palivu hnajavoj žyžaj.

Śpiecyjalistu ciažka pahadzicca z prapanavanym u spravazdačy sposabam utylizacyi hetych adchodaŭ.

Ekołah nie razumieje, jakuju sielskahaspadarčuju kulturu možna palivać dva razy ŭ dzień try miesiacy zapar?

A ŭ rasijskaj mietadyčnaj rekamiendacyi ŭvohule zabaraniajuć vykarystoŭvać paliŭ hnajavymi ściokami.

Imi rajać uhnojvać šmathadovyja travy na łuhach i pašach, vykarystoŭvajučy ahrehaty, jakija zabiaśpiečvajuć uniasieńnie hnoju na hłybiniu nie mienš za 17 santymietraŭ i vyklučajuć zabrudžvańnie im pavierchni hleby.

Na 12 hiektaraŭ ziamli buduć štodzień vylivać 12 cysternaŭ adchodaŭ

Štodzionny abjom ściokaŭ – 315,4 kubičnyja mietry. Ličba dajecca ŭ spravazdačy.

U adnoj čyhunačnaj cysternie moža źmiaščacca 60 kubičnych mietraŭ ściokaŭ. Atrymlivajecca, kožny dzień buduć źbirać stolki adkidaŭ, kolki pa abjomu źmieściva piaci cysternaŭ.

Utrymlivać ścioki płanujuć ciaham 210 dzion. Za hety čas, kali znoŭ pravodzić anałohiju z cysternami, ich zapoŭnicca ściokami bolš čym 1100. Taki abjom adchodaŭ buduć raźmiarkoŭvać na 12 hiektarach ziamli ciaham troch miesiacaŭ. Atrymlivajecca, kožny dzień na pali buduć vylivać pa 12 cysternaŭ.

Ekśpiert raić zahadzia padumać: dzie ŭziać stolki techniki i rabočych, jakija zmahli b zabiaśpiečyć pracu takoj schiemy?

Adstupili ad Techničnaha kodeksa

Jak zaŭvažaje ekśpiert, u spravazdačy nie praličyli vydzialeńnie zabrudž­valnych rečyvaŭ u navakolle padčas uniasieńnia hnoju ŭ hlebu.

Najbolš niebiaśpiečnyja vydzialeńni amijaku i sieravadarodu. Takija raźliki śpiecyjalisty, što rabili spravazdaču, nie praviali.

Heta adstupleńnie ad patrabavańniaŭ Techničnaha kodeksa ŭstalavanaj praktyki «Praviły raźliku vykidaŭ ad žyviołahadoŭčych kompleksaŭ, źvierafiermaŭ i ptuškafabryk». Tablica 3-4 TKP 17.08-11-2008

U prajekcie jość vidavočnyja pamyłki

Dla ŭtylizacyi vadkich ściokaŭ u spravazdačy zaprajektavanyja łahuny. Adnak na adnoj staroncy prapisana, što buduć dźvie łahuny, a na inšaj – try.

Abjom adnoj – 11 tysiač kubičnych mietraŭ. Dźviuch, adpaviedna, 22 tysiačy.

Dalej havorka idzie pra kałodziež dla palivańnia bližejšych paletkaŭ. Tudy pierapampoŭvajecca vada z łahun. Tut raźliki viaducca ź ličbaj 35 tysiač kubičnych mietraŭ vadkich ściokaŭ.

Adkul uziałasia hetaja ličba, ekołahu niezrazumieła.

Śpiecyjalist ličyć, što abjomy łahun i ich płošča zanižanyja. Adpaviedna zanižanaja i kolkaść zabrudžvalnych rečyvaŭ, jakaja vyłučajecca ŭ atmaśfieru.

Ci buduć zabrudžvacca vody

Nie mienš ludziej chvaluje, ci adabjecca śvinakompleks na vadzie. Jak adznačaje ekołah, prajektavańnie inžyniernaha ŭładkavańnia paletkaŭ, jakoje praduchilała b zabrudžvańnie pavierchnievych i drenažnych vod, paprostu nie zroblenaje. U spravazdačy niama acenki mahčymaha zabrudžvańnia vodnych abjektaŭ, što pobač.

Niama prajektnych rašeńniaŭ pa zbory, karanciravańni, ačystcy i ŭtylizacyi liŭnievych i tałych vod z vyhulnych placovak i terytoryi kompleksu.

Chto i dla kaho rabiŭ spravazdaču

Heta tolki asnoŭnyja momanty, jakija adznačyŭ ekśpiert. Jany lažać na pavierchni. Ale i z hetaha vynikaje šmat pytańniaŭ pa prajektavańni budaŭnictva adnaho z samych hihanckich śvinakompleksaŭ Biełarusi.

Spravazdača ab acency ŭździejańnia śvinakompleksu ŭ Mojsičach na navakolle zroblenaja pa zakazie kampanii «Viales-Mit» u Maładziečnie. Jana vyrablaje miasnuju pradukcyju dla Biełarusi i na ekspart.

• 0
• 0
• 0
• 0
• 0
• 0
• 0
• 0