Biełaruskamoŭny adkaz ad Dzieda Maroza? Ad biełaviežskaha — nie, ad katalickaha Śviatoha Mikałaja — tak
Dzieci mohuć pisać listy Dziedu Marozu adrazu na niekalki adrasoŭ. Ale pa nivodnym nie varta čakać adkazu pa-biełarusku.
Biełaruskaja rezidencyja Dzieda Maroza prymaje listy ŭ Biełaviežskaj puščy.
Da 22 śniežnia možna zamović i asablivaje vinšavańnie z paštoŭkaj i cackaj ad biełaruskaha Dzieda Maroza.
Ale vinšavańnie budzie pa-rusku.
Jak paćvierdzili «Našaj Nivie» ŭ «Biełpošcie», list pa-biełarusku ź biełaruskaj rezidencyi Dzieda Maroza nie pryjdzie, takoj pasłuhi niama.
Taksama jak nie pryjdzie z rasijskaj rezidencyi ŭ Vialikim Uściuhu. Listoŭ ź Biełarusi, jak raspaviali «Našaj Nivie» ŭ rasijskaj rezidencyi, prychodzić niamała, ale adkazy pa-biełarusku nie praduhledžanyja (tolki pa-rusku i pa-anhlijsku).
Nie pišuć biełaruskamoŭnych listoŭ i z Łapłandyi. Listy z łapłanskaj rezidencyi Kaladnaha Dzieda možna atrymać na anhlijskaj, finskaj, ruskaj, japonskaj, katałonskaj i inšych movach. Ale biełaruskaj u śpisie niama.
Źviazacca ź biełaruskamoŭnym Śviatym Mikałajem dapamahaje tolki kaścioł. Vinšavańni dzieciam ad Śviatoha Mikałaja moładzievaja misija «Čystaje Serca» abiacaje vysłać u adkaz na list pa adrasie 220030, h. Minsk, vuł. Revalucyjnaja, 1A. Nie zabudźciesia paznačyć dakładny zvarotny adras!
Viedajecie inšyja adrasy, pa jakich možna źviazacca ź biełaruskamoŭnymi Dziedam Marozam i Śviatym Mikałajem? Napišycie ab hetym u kamientarach.
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi22
Kamientary