Vajenny fłot ZŠA zapłaciŭ 1 cent za toje, kab adpravić avijanosiec «Rejndžar» na mietałałom, paviedamiŭ sajt foxnews.com.
Mahutny karabiel, jaki ŭvachodziŭ u šerah tak zvanych «supieravijanoscaŭ» — samych vialikich na toj čas u historyi fłotu ZŠA, amatary vajennaj historyi i vieterany prapanoŭvali pierarabić u stacyjanarny marski muziej, adnak nie zmahli sabrać dla hetaha patrebnych $35 młn.
«Rejndžar» słužyŭ amal zaŭsiody na Cichim akijanie — supraćstajaŭ savieckamu fłotu, padtrymlivaŭ avijacyjaj dziejańni amierykanskich i paŭdniovavjetnamskich vojskaŭ, bambiŭ abjekty ŭ kamunistyčnym Paŭnočnym Vjetnamie, udzielničaŭ u humanitarnych ratavalnych apieracyjach padčas pryrodnych katastrof u rehijonie.
Pry poŭnaj zahruzcy «Rejndžar» mieŭ vodaźmiaščeńnie 81 000 ton, na im słužyli bolš za 3800 čałaviek i baziravalisia da 90 samalotaŭ.
Na karabli zdymali tele- i kinafilmy, u tym liku znakamity chit Toma Kruza «Top Gun».
U 1991 hodzie vieteran Chałodnaj vajny udzielničaŭ u apieracyi «Bura ŭ pustyni», a ŭ 1993-m paśla 36-hadovaj słužby byŭ vyklučany z bajavoha składu fłota.
Ciapier novy ŭładalnik karabla, kampanija International Shipbreaking, adbuksiruje «Rejndžar» vakoł Paŭdniovaj Amieryki na atłantyčnaje ŭźbiarežža ZŠA, dzie pareža jaho na mietał. Košt apieracyi amal adpaviadaje koštu mietała, jaki kampanija atrymaje ŭ vyniku.
«My b chacieli, kab jon staŭ muziejem, adnak heta było niemahčyma. Na žal, dla hetaha nie chapiła hrošaj», — skazaŭ pres-sakratar VMF ZŠA Krys Džonsan.
Kamientary