Minbudarchitektury: Abvalnaha padaražeńnia na rynku nieruchomaści nie čakajecca

U Ministerstvie budaŭnictva i architektury Biełarusi nie čakajuć «abvalnaha padaražeńnia» na rynku žyłoj nieruchomaści Biełarusi.

Pra heta havorycca ŭ piśmovym adkazie za podpisam pieršaha namieśnika ministra budaŭnictva i architektury Alaksandra Kručanava, jaki BiełaPAN atrymaŭ na pytańnie ab mahčymym padaražeńni budaŭnictva žylla ŭ suviazi ź situacyjaj na valutnym rynku. 

U apošniaj dekadzie śniežnia 2014 hoda niekatoryja zabudoŭščyki, adreahavaŭšy na ŭviadzieńnie 30-pracentnaha zboru na kuplu valuty, pavysili ceny ŭ biełaruskich rublach na 20—25%. 

Jak havorycca ŭ adkazie Minbudarchitektury, u 2015—2016 hadach płanujecca pabudavać pa 5 młn. kv. mietraŭ ahulnaj płoščy žyłych damoŭ. «Abjom budaŭnictva žylla i jaho finansavańnie zbałansavanyja pad realnyja mahčymaści i patrebnaści rehijonaŭ. Praduhledžvajecca, što, pakolki niama źnižeńnia abjomaŭ budaŭnictva, to abvalnaha padaražeńnia na rynku nieruchomaści nie čakajecca. Heta najpierš tyčycca hramadzian, jakija znachodziacca na ŭliku majučych patrebu ŭ palapšeńni žyllovych umoŭ i majuć pa zakanadaŭstvie prava na dziaržaŭnuju padtrymku pry budaŭnictvie ci nabyćci žylla», — zaznačajecca ŭ liście. 

Pry hetym ukazvajecca, što dla hetaj katehoryi žyllo budujecca pa prajektach ekanamičnych damoŭ typavych spažyvieckich jakaściej z prymianieńniem tolki ajčynnych budaŭničych materyjałaŭ, kanstrukcyj i abstalavańnia. «Što da kamiercyjnaha žylla, to tut pieradusim pracujuć rynačnyja miechanizmy, suadnosiny popytu i prapanovy», — zaznačyli ŭ viedamstvie. 

«Što da rehulavańnia cen u budaŭničaj śfiery, to, pa-pieršaje, praduhledžvajecca, što indeks źmianieńnia koštu budaŭniča-mantažnych rabot na praciahu 2015 hoda zachavajecca na ŭzroŭni śniežnia 2014 hoda i nie budzie pavialičvacca. Pa-druhoje, raspracavana i dziejničaje sistema pastajannaha kantrolu za koštam ajčynnych budaŭničych materyjałaŭ. Aprača taho, zhodna z pastanovaj urada № 1055 ad 8 listapada 2014 hoda, ustanoŭleny adzinyja miežavyja narmatyvy koštu 1 kv. mietra ahulnaj płoščy žyłoha pamiaškańnia jak u šmatkvaternych žyłych damach, tak i dla budaŭnictva ŭ sielskahaspadarčych arhanizacyjach», — reziumujecca ŭ adkazie pieršaha namieśnika ministra Minbudarchitektury.

Jak paviedamlałasia raniej, adziny miežavy narmatyŭ koštu 1 kv. m ahulnaj płoščy žyłoha pamiaškańnia ŭ 2015 hodzie ŭstanoŭleny ŭ 6,6 młn. rubloŭ, a miežavy pakazčyk koštu 1 kv. m ahulnaj płoščy žyłoha doma (kvatery) — nie vyšejšy za 9,4 młn. rubloŭ, dla vydačy lhotnaha kredytu adkrytym akcyjaniernym tavarystvam «Biełahraprambank» na budaŭnictva (rekanstrukcyju) žyłych damoŭ (kvater) u sielskahaspadarčych arhanizacyjach.

• 0
• 0
• 0
• 0
• 0
• 0
• 0
• 0