Ciahnik Minsk—Varšava pakinuć da maja, ciahniki da Vilni źmienšać, pad pahrozaj i niekatoryja maršruty va Ukrainu
Transpartniki Biełarusi i Polščy vyrašyli nie spyniać firmovy ciahnik Minsk-Varšava jak minimum da maja. Pra heta siońnia paviedamiŭ pieršy namieśnik načalnika pasažyrskaj słužby BČ Andrej Kaško, piša «Virtualny Brest».
Letaś čyhunačny skład chadziŭ ź Minska da Varšavy napaŭpusty. A da kanca hoda z-za prablem na valutnym rynku jaho napaŭnialnaść i zusim źniziłasia da 35%. Hety ciahnik niepapularny ŭ pasažyraŭ hałoŭnym čynam z-za darahavizny kvitkoŭ — amal 1,3 miljona ŭ adzin bok. Heta amal jak cana za samalot, prytym što ciahnik niekamfortny, pasažyry hublajuć niekalki načnych hadzin na zamienie kołaŭ u Bieraści.
Pytańnie pra zakryćcio pramoha čyhunačnaha złučeńnia pamiž dźviuma stalicami ŭ siaredzinie studzienia zajaviŭ polski bok. Adnak biełaruskaja čyhunka paprasiła zachavać ciahnik.
— My budziem rabić markietynhavyja chady, kab zrabić bolš dastupnymi kvitki na ciahniki ŭ hetym kirunku, — kaža pradstaŭnik Biełaruskaj čyhunki Andrej Kaško..
Biełaruskaja čyhunka nie źbirajecca admianiać i ciahniki va Ukrainu, choć pasažyrapatok u hetym kirunku letaś upaŭ amal u dva razy.
I tam taksama ŭkrainski bok chacieŭ by źmienšyć kołḱaść ciahnikoŭ, biełarusy ž prapanujuć źnižać ceny na bilety, ale maršruty zachavać..
Na kirunku Minsk — Vilnia častata ruchu nie źmienicca, ale kolkaść miescaŭ u niekatorych ciahnikach moža skaracicca.
— Heta tyčycca ciahnikoŭ №801 i №802, jakija znachodziacca ŭ darozie bolš za čatyry hadziny. Pasažyraŭ tam chapaje, pa sutnaści, tolki dla taho, kab zapoŭnić dva vahony. Paskoryć ruch hetaha składu pakul nie ŭdajecca, — pryznaŭsia Andrej Kaško.
Kamientary