Siońnia na pieršym paviersie univiersama «Centralny» prybrali pieraharodku, jakaja adździalała stoliki ad prachodu, ale sam bar zastajecca na miescy.
«Istotnych źmienaŭ nie adbyłosia, — kamientuje dyrektar ZAT «Univiersam Centralny» Alaksandr Alaksiejčuk. — Prosta ciapier my prybrali pieraharodku la ŭvachoda, kab było troški bolš svabodna. Sami stoliki zastajucca, dalej my płanujem pastavić jašče niekalki, naviednikam budzie dzie prysieści, kab vypić kavy dy źjeści pirožnaje.
Fota z fejsbuka Viktara Kontara.
«U nas usie majstry razburać staroje, a stvarać novaje imknucca daloka nie ŭsie, — kaža dyrektar. — My ž imkniomsia padtrymlivać tradycyi, zachoŭvać lepšaje, ale adaptavać da sučasnych umoŭ. Tamu chvalavacca nie treba: stojka nikudy nie dzieniecca, my prosta chočam aptymizavać prastoru».
Pieršy pavierch «Centralnaha», pa słovach Alaksiejčuka, čakajuć istotnyja źmieny, ale prajekt pakul u raspracoŭcy.
«My chočam zrabić try błoki: pieršy — kandytarskaja zona, dzie možna nabyć haračyja napoi dy ŭsialakija prysmaki i pasiadzieć za stolikami, druhaja — tak zvany «fud-kort»: heta stojka, za jakuju ŭsie chvalujucca. Tam možna budzie stać i pierakusić blinčykami, smažankami dy ŭsim astatnim. I treciaja zona — piŭnaja, my budziem sprabavać jaje źmianić tak, kab prybrać ludziej z trafika, kab nichto nikomu nie pieraškadžaŭ. Ale freski, žyrandoli dy lapnina zastanucca».
Univiersam «Centralny» — kultavaje miesca nie dla adnaho pakaleńnia minčukoŭ. Jon adkryŭsia ŭ 1954 hodzie jak kaviarnia, dzie možna było vypić harbaty i nabyć da jaje roznych prysmakaŭ. Kolki miesiacaŭ tamu pajšli hutarki ab tym, što ŭ «Centralnym» pierastanuć pradavać piva, a stojku pobač z kasami prybiaruć.
Hladzicie taksama: Tut źbirajucca «centravyja», a nie «łachi z rajonaŭ»: insajdarski VIDEAREPARTAŽ z univiersama «Centralny»
