Mikita Siemianienka: Dziasiatki biełarusaŭ hatovyja fizična sustreć «Načnych vaŭkoŭ»
Aktyvist maładziožnaha kryła Ruchu «Za Svabodu» Mikita Siemianienka inicyjavaŭ praz sacyjalnyja sietki kampaniju «Nie prajezdu rasijskich bajkieraŭ-terarystaŭ praź Biełaruś!»
Havorka viadziecca pra arhanizacyju pratestu suprać motaprabiehu supołki «Načnyja vaŭki» pa terytoryi našaj krainy i pieraškody hetaj akcyi.
U adoźvie da biełarusaŭ havorycca: «Naprykancy krasavika 2015 hodu banda rasijskich bajkieraŭ-terarystaŭ «Načnyja vaŭki», što ŭdzielničali ŭ akupacyi Krymu i praciahvajuć ŭdzielničać u vajennych dziejańniach na baku sieparatystaŭ suprać Ukrainy, płanujuć prajechać pa Biełarusi, spyniajučysia ŭ Minsku i Breście, i dalej pa tak zvanym «šlachu savieckaha vojska» praz Polšču, Čechiju, Słavaččynu, Aŭstryju i Niamieččynu. Bajkiery Jeŭrasajuzu vystupili kateharyčna suprać prajezdu bandytaŭ praz terytoryi svaich krainaŭ. Spadziajemsia, što bajkierskaja supolnaść Biełarusi niezaležna ad kłubnaj prynaležnaści pakaža dzie miesca prapucinskaj terarystyčnaj arhanizacyi i zrobić usio mahčymaje, kab nie puścić jaje ŭdzielnikaŭ na biełaruskija darohi».
Amal usie bajkierskija supołki Biełarusi ŭžo zajavili, što nie dałučacca da skandalnaha motaprabiehu, jaki «Načnyja vaŭki» majuć namier zładzić pa našaj krainie z 25 pa 27 krasavika.
Płanavany raskład i maršrut ich ruchu taki:
«25.04 — Smalensk —Minsk, start a 19:00, daroha zojmie 4 hadziny, prybyćcio a 23:00 — sustreča ź minskaj filijaj «Načnych vaŭkoŭ» kala Kurhanu Słavy. 26.04 — Minsk — Chatyń, start a 08:00, prybyćcio a 09:00. 26.04 — Minsk — Brest, start ab 11.00, prybyćcio a 16:00, sustreča z bresckimi «vaŭkami», pachod na Bresckuju krepaść. 27.04 — a 08:00 start ad Bresta na Urocłaŭ (praz pamiežny pierachod «Ciarespal»)».
Siemianienka kaža, što ŭ polskim Ciarespali rasijskich bajkieraŭ «čakaje abjadnany mižnarodny supraciŭ biełarusaŭ, palakaŭ, čechaŭ, słavakaŭ, aŭstryjcaŭ, niemcaŭ i ŭkraincaŭ». Pa słovach aktyvista Ruchu «Za Svabodu», «dziasiatki biełarusaŭ hatovyja fizična sustreć zhraju «Načnych vaŭkoŭ».
Kamientary