Pasoł Ukrainy ŭ Biełarusi Michaił Ježal budzie adklikany, takoje rašeńnie ŭžo pryniata. Pra heta žurnalistam paviedamiŭ prezident Ukrainy Piatro Parašenka.
«Mnoju pryniata rašeńnie ab jaho adklikanni», — skazaŭ jon, adznačyŭšy, što zaraz rychtujucca nieabchodnyja dakumienty.
Parašenka padkreśliŭ, što «Minsk ciapier ihraje vielmi vialikuju rolu ŭ realizacyi zamiežnaj abaronnaj palityki i palitycy biaśpieki».
«Ja pavinien uličvać hetuju rolu, kab zabiaśpiečyć pastajannuju prysutnaść Ukrainy ŭ Minsku», — dadaŭ kiraŭnik ukrainskaj dziaržavy.
Michaił Ježal byŭ pryznačany pasłom Ukrainy ŭ Biełarusi ŭ krasaviku 2013 byłym prezidentam Ukrainy Viktaram Janukovičam.
Zhodna z zakonam ab ačyščeńni ŭłady, pryniatym Viarchoŭnaj Radaj Ukrainy ŭ vieraśni minułaha hoda, pad lustracyju traplaje i Michaił Ježal, jaki da svajho pryznačeńnia Nadzvyčajnym i Paŭnamocnym Pasłom Ukrainy ŭ Biełarusi z 2010 pa 2012 hod byŭ ministram abarony Ukrainy, a z 2008 pa 2010 hod — hałoŭnym inśpiektaram Hałoŭnaj inśpiekcyi Ministerstva abarony Ukrainy.
13 žniŭnia 2014 stała viadoma, što Hienieralnaja prakuratura Ukrainy pradjaviła padazreńnie byłomu ministru abarony krainy Michaiłu Ježalu. Jon abvinavačvajecca ŭ naniasieńni svajoj dziaržavie škody na sumu bolš za 42 młn hryŭniaŭ (bolš za 5 młn dalaraŭ na momant mierkavanaha złačynstva).
Abvinavačvańni tyčacca pieryjadu pracy Ježala na pasadzie ministra abarony Ukrainy pry prezidencie Viktara Janukoviča. Padazreńnie abvieščana ŭ ramkach kryminalnaj vytvorčaści pa faktach padryvu abaranazdolnaści armii.
Kamientary