Jak asvoiłasia Śviatłana Cichanoŭskaja ŭ Varšavie i ci ŭžo pajšła na boks? Raspytali

Hety miesiac dla Śviatłany Cichanoŭskaj byŭ nasyčanym na mižnarodnyja pajezdki i łakalnyja sustrečy: Miunchienskaja kanfierencyja pa biaśpiecy, sustreča-bryfinh ambasadaraŭ Kamiteta ministraŭ Rady Jeŭropy ŭ Strasburhu, razmovy ź biełaruskimi kulturnymi dziejačami Varšavy, dobraachvotnikami, arhanizacyjami, jakija dapamahajuć palitviaźniam.

Ale ci atrymałasia azirnucca i acanić Varšavu jak novy dom? Ci znajšłosia ŭžo miesca pad novy ofis? I ci zakryłasia pytańnie z kaśmietołaham i trenieram pa boksie, jakich Cichanoŭskaja šukała praz Threads? 

Pavialičyć

«Naša Niva»: Jak vam adčuvańnie siabie ŭ Varšavie na kantraście ź Vilniaj — što niazvykła? U vas usio ž praskokvała raniej, što Vilnia stała domam.

Śviatłana Cichanoŭskaja: Tak, Vilnia sapraŭdy dla mianie była jak dom. Ale i zastajecca taksama. U samy ciažki momant Litva pryniała nas i praciahnuła ruku dapamohi, za što ja vielmi ŭdziačnaja.

A adčuvańnie doma mnie zaŭsiody dajuć biełarusy. I tut, u Varšavie, ich vielmi šmat (i sumna, i radasna adnačasova ad hetaha).

«NN»: U Threads vielmi šmat replik-reakcyj sabrała vaša prośba paraić majstroŭ pa manikiury, kaśmietołaha i hetak dalej — ci znajšli vy ŭžo sabie zamienu na novym miescy?

SC: Prosta paŭstała situacyja, što treba znajści sabie ludziej, jakija ŭmiejuć navodzić pryhažość. Adrazu pryjšoŭ u hałavu Threads. I ja padumała, što heta budzie karysna nie tolki mnie, ale i inšym biełarusam. Tamu i zrabiła taki post. Voś i ŭsio.

Darečy, tam pakinuli bolš za 300 kamientaroŭ — prosta mora talenavitych biełarusaŭ i biełarusak. Abrać vielmi składana — nie chapiła navat času prahladzieć usie spasyłki. Ale ja pryhladzieła niekalki varyjantaŭ užo.

«NN»: Jak vy naviedvajecie majstroŭ, ci patrabujucca vam dadatkovyja ŭmovy biaśpieki — naprykład, «kabiniet na hety čas tolki dla mianie»?

SC: Ja zvyčajny čałaviek i naviedvaju majstroŭ, jak i ŭsie ludzi. Nu, i kali zapisvajusia pieršy raz, to, jak praviła, nie na svajo imia.

«NN»: Kaśmietołah i manikiur — heta siońnia dla vas baza ŭ dohladzie? Što jašče ŭvachodzić u vašu bjuci-rucinu?

SC: Tak, manikiur plus vałasy — farbavańnie i stryžka. Štodzionny mejkap ja rablu sama.

A raskošny maksimum z našym pracoŭnym hrafikam — dobry son i vychodny dzień. Snu nie chapaje.

«NN»: A što z boksam, taksama znajšli treniera ŭ Varšavie? 

SC: Da adnaho treniera-biełarusa, darečy, užo chadziła. Mnie vielmi spadabałasia, ale pahladžu jašče varyjanty.

Jak kažuć treniery: kab uvieści sport u žyćcio, treba znajści toje, što budzie padabacca. Voś u mianie tak i zdaryłasia z boksam: tam takija nahruzki, što jość mahčymaść i ŭ formie siabie trymać, i niehatyŭnuju enierhiju vypuścić.

«NN»: Ci vyrašyłasia ŭžo pytańnie z łakacyjaj dla varšaŭskaha ofisa?

SC: U pracesie. I my ŭžo hladzieli prapanovy ad varšaŭskaj meryi. Rychtujecca dakumientacyja, potym budzie ramont, i my, spadziajusia, nieŭzabavie adčynim dźviery. I zrobim tak, kab ofis byŭ adkryty dla biełarusaŭ.

• 28
• 0
• 2
• 4
• 0
• 0
• 0
• 2