Vyjava: news.microsoft.com
«Ciapier my vypuskajem Windows 10, a praz toje, što Windows 10 heta apošniaja viersija Windows, my ŭsie pracujem nad Windows 10», — takuju zahadkavuju frazu skazaŭ Džery Niksan, raspracoŭščyk-«jevanhielist» Microsoft, pieradaje The Verge.
Fraza značyć, što Microsoft nie pracuje adnačasova nad jašče adnoj viersijaj Windows — jak padčas vypusku Windows 8.1 pracavała nad Windows 10. Paśla «dziasiatki» kampanija nie płanuje «nastupnuju Windows».
Ciapier raspracoŭščyki mohuć volna kazać pra abnaŭleńni Windows, bo nijakaha «vialikaha sakretu» niama — Windows budzie atrymlivać pastupovyja, nievialikija abnaŭleńni. U jakaści prykładu pryvodzicca braŭzier Chrome, jaki abnaŭlajecca rehularna, ale biez hučnych prezientacyj i revalucyjnych źmien.
Heta moža hučać jak admova ad Windows ci sproba jaje «zabić», ale na samoj spravie heta śviedčyć ab źmienie biźnies-madeli. Ad madeli rehularnaha prodažu novych prahramnych praduktaŭ Microsoft piarojdzie da madeli «Windows jak servis».
Windows 11 ci Windows 12 nie kupiš. Pryjdziecca kuplać padpisku na Windows na jašče adzin hod.
Padrabiaznaści schiemy raspaŭsiudu nieviadomyja. Mahčyma, schiema budzie padobnaj da siońniašniaha raspaŭsiudu pakietu prahram Office 365. Taksama nieviadoma, jak apieracyjnaja sistema budzie pracavać u vypadku nieapłaty.
***
Papiaredniuju viersiju Windows 10 možna biaspłatna pasprabavać užo siońnia. Jana maje ciesnuju intehracyju nastolnaha kampjutara i mabilnych pryład, hałasavy asistent Cortana, braŭzier Edge (raniej viadomy jak Project Spartan), pierapracavanaje mieniu «Pusk» dy mnostva inšych navinak.
Vychad nastolnaj viersii Windows 10 čakajecca letam 2015 hoda, mabilnaj — krychu paźniej.
