Pieršyja Apple Watch u Biełarusi. Uražańni ŭładalnika
«Kali hadzińnik zmoža skazać mnie, što ŭ mianie praz tydzień budzie infarkt…»
Razumnyja hadzińniki Apple pastupili ŭ prodaž na Zachadzie, aparaty pačynajuć akolnymi šlachami dabiracca ŭ Biełaruś. Adzin ź pieršych uładalnikaŭ Apple Watch, prahramist Kirył Kudzin, padzialiŭsia z «Našaj Nivaj» uražańniami ad hadzińnika.
Kirył maje madel Apple Watch Sport u madyfikacyi ź vialikim (42 mm u dyjahanali) ekranam. Taki hadzińnik kaštuje 399 dalaraŭ u ZŠA, ale jamu jon abyšoŭsia zaŭvažna daražej — aparat lacieŭ da jaho praz akijan.
Chacia rabočaje miesca Kiryła abstaŭlenaje i abkładzienaje technikaj Apple, jon kuplaŭ hadzińnik nie prosta «dla kamplektu».
«Na samoj spravie, mnie było ŭsio roŭna, jakuju kankretna madel abirać, — tłumačyć jon. — Nu tak, prykolna było b Sport, prykolna było b bieły hadzińnik. Ale jak by treba było prosta ŭziać hadzińnik u ruki. Zaraz raźbiaremsia — i aktualnaść hadzińnikaŭ spadzie».
Kirył — raspracoŭščyk papularnaj mabilnaj prahramy WiFi Map. Jana jość najvialikšaj u śviecie bazaj parolaŭ da hramadskich WiFi-sietak, jakuju stvarajuć i padtrymlivajuć 11 młn čałaviek. Svaju prahramu jon adaptavaŭ i dla Apple Watch.
Raniej jon mieŭ «amal razumny» hadzińnik z kłasičnym dyzajnam, miechaničnymi strełkami, ale sensarnym ekranam. Jon adznačaje, što Apple Watch lahčejšy dy tančejšy, kamfortna adčuvajecca na ruce i vyhladaje dastatkova stylova.
Svaju tytulnuju funkcyju — pakazvać čas — hadzińnik vykonvaje spraŭna. Dazvalaje navat abrać siarod mnostva vyhladaŭ, ad ličbavaha hadzińnika z padrabiaznaściami kalendara i nadvorja da anałahavaha hadzińnika ź Miki Maŭsam.
Praŭda, vykonvaje niadoŭha. Pry tym, što paŭdnia Kirył aktyŭna karystaŭsia hadzińnikam dy pakazvaŭ jaho pa prośbach siabroŭ, za 5 hadzin «źjełasia» 20% batarei.
Da viečara hadzińnik «dažyvaje» biez padzaradki, moža pratrymacca i dolej. Ale ŭsio roŭna Kirył nazyvaje jaho «nastolnym» — na niekalki dzion ad razietki nie adjedzieš.
Chacia niekatoryja pieršyja karystalniki Apple Watch kazali, što interfiejs hadzińnika prytarmožvaje, Kirył takoha nie zaŭvažyŭ. Ale adznačaje: jość zatrymka z uklučeńniem ekrana. Ekran hadzińnika haryć nie zaŭsiody, kab jon uklučyŭsia, treba ŭzmachnuć rukoj tak, jak kali hladziš na zvyčajny hadzińnik — mienavita ŭ hety momant hadzińnik reahuje, na jaho dumku, nie nadta chutka.
Najbolš Kirył «hulajecca» z pulsamieram — naprykład, jon zaŭvažyŭ, što kali vychodziŭ z domu, mieŭ narmalny puls, ale kali sieŭ u taksi, puls ź niejkaj pryčyny padvysiŭsia.
«Vielmi zručna, što paviedamleńni siudy prychodziać, — kaža jon. — Telefon raniej treba było pastajanna brać, a tut adrazu pad rukoj. Nie na ŭsie paviedamleńni treba adkazvać, bolšaść ź ich prosta infarmacyjnyja. My pa pracy ŭsioj kamandaj pierapisvajemsia, zručna zaŭsiody być u kursie, razumieć, što adbyvajecca».
Da taho ž, hadzińnik moža prymać telefanavańni i dazvalaje razmaŭlać pa hučnaj suviazi, nie adryvajučy ruku z hadzińnikam ad zvykłaj spravy. «Jašče jon prykolna hudzie, kali pastupaje vyklik», — śmiajecca Kirył.
«Prahram chapaje, ale jany ŭsie niejkija niepaŭnavartasnyja, — kaža jon. — Mahčyma, jašče nie ŭsie raspracoŭščyki majuć na rukach hadzińniki, tamu prahramy takija napaŭniedaroblenyja».
Prahramy na Apple Watch nie samastojnyja. Usie jany ŭstalavanyja taksama na telefonie, tam ža i vykonvajucca. Hadzińnik vystupaje ŭ roli dadatkovaha ekranu, a taksama naboru datčykaŭ — pulsamier, krokamier i inšych. Biez telefona hadzińnik zmoža chiba pakazvać čas i mierać puls.
Usie prahramy na Apple Watch majuć vielmi sproščany vyhlad. WiFi Map — nie vyklučeńnie. Kali na telefonie karystalnik bačyć padrabiaznuju kartu z dastupnymi WiFi-sietkami, to na hadzińniku pakazvajucca tolki niekalki bližejšych WiFi-sietak dy paroli da ich.
Takim ža čynam pracujuć astatnija prahramy, što demanstruje ŭładalnik Apple Watch. Pa zmoŭčvańni płejer pakazvaje tolki nazvu pieśni dy knopki Play, dalej i nazad (chacia pa naciskańni dazvalaje abrać kampazicyi sa śpisu). Prahnoz nadvorja pakazvaje tolki tempieraturu i piktahramu nadvorja (ale pa naciskańni moža pakazać pahadzinny prahnoz na dzień).
Cikavym čynam pracujuć paviedamleńni. Apple Watch dazvalaje nie tolki čytać SMS ci iMessage (a taksama inšyja mesendžary), ale i adkazvać — ci smajlikam, ci šabłonnaj frazaj, ci praz nadyktoŭku adkazu i raspaznavańnie hołasu.
«Raspaznaje jano niepahana, — kaža Kirył pra nadyktoŭku hołasam. — Žonka prysłała fota, ja adkazaŭ «achranieć», jano tak i raspaznała — achranieć».
Padtrymka raspaznavańnia ruskaj movy jość, chacia hałasavy asistent Siri jašče nie padtrymlivaje ruskuju movu (mahčyma, što padtrymka ruskaj movy moža prosta być zabłakavanaja, bo hadzińnik jašče nie pradajecca ŭ Rasii). Padtrymki biełaruskaj movy, jak i ŭ inšych praduktach Apple, niama tym bolš.
Kirył nie dumaje, što Apple Watch siońnia kaštuje svaich hrošaj.
«Pieršaje — heta cana, — razvažaje jon. — Cana z dva Android-smartfony — heta cana za hadzińnik, jaki sam pa sabie ničoha nie moža, jaki jość tolki «prybłudaj» da telefona. Ich buduć kuplać ci tyja, chto zusim-zusim fanaty Apple, ci tyja, dla kaho heta zusim nievialikija hrošy. Pa-druhoje, płacić 400 dalaraŭ za toje, kab adkazać na paviedamleńnie ci zvanok, kali i tak maješ z saboj pobač telefon… Inšych vartych scenaroŭ vykarystańnia ja pakul nie baču».
Jon zhadvaje, što Apple rabiła ŭpor na fitnes-funkcyi i apłatu z hadzińnika zamiest bankaŭskaj kartki. «Ale płociš ty nie tak časta, kab lanota było dastać telefon, — razvažaje jon. — A ź fitnesam, mahčyma, budzie cikava, kali ŭ Apple atrymajecca prynamsi ŭ Štatach zaviazać fitnes-funkcyi na kliniki».
Kirył bačyć patencyjał u hadzińniku. U im mohuć źjavicca funkcyi, jakich my siońnia mo i nie ŭjaŭlajem.
Naprykład, užo siońnia hadzińnik moža zachavać infarmacyju pra puls i fizičnuju aktyŭnaść uładalnika. Kali hetyja funkcyi raźvić, kali infarmacyju pra zdaroŭje adsyłać na analiz daktaram, moža atrymacca maleńkaja revalucyja ŭ achovie zdaroŭja.
«Navat strachavyja kampanii zmohuć dyfierencavać ryzyki, rabić bolš tannuju ci darahuju strachoŭku ŭ zaležnaści ad stanu zdaroŭja, — fantaziruje jon. — Dy kali hadzińnik zmoža skazać mnie, što ŭ mianie praz tydzień budzie infarkt, kali doktar zmoža pa infarmacyi ź jaho heta vyznačyć — voś heta budzie kruta, tady jon budzie kaštavać svaje 400 dalaraŭ».
Ciapier čytajuć
«My čakali Połk Kalinoŭskaha, kab vyzvaliŭ nas». Palitviazień patłumačyŭ, čamu paprasiŭ ab pamiłavańni1
«My čakali Połk Kalinoŭskaha, kab vyzvaliŭ nas». Palitviazień patłumačyŭ, čamu paprasiŭ ab pamiłavańni
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier22
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier2
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu66
Kamientary