Ličba dnia: kolki biełarusu treba pracavać, kab kupić dom, jak u Ščotkinaj
Marjana Ščotkina ličyć, što biełarusam varta pracavać jašče bolš. Tym, chto zarablaje mała, jana raić «pakrucicca» i znajści druhuju pracu.
Sama ministr ciapier zakančvaje budaŭnictva ŭłasnaha doma ŭ elitnym pasiołku Vieśninka, dzie ŭ jaje 11 sotak ziamli. Tut pa susiedstvie ź joj žyvuć i inšyja vyšejšyja čynoŭniki. Košt ziamli i nieruchomaści, jak u Ščotkinaj, ryełtarami aceńvajecca prykładna ŭ 1 młn dalaraŭ. Praŭda, heta košt prodažny. Košt budaŭnictva, kaniečnie, budzie mienšy.
Siaredni zarobak u Biełarusi ŭ krasaviku 2015 skłau 452 dalara. Atrymlivajecca, prostamu biełarusu daviadziecca pracavać 184 hady, kab kupić taki dom.
Jakija jašče parady ministr pracy davała biełarusam, kab žyć stała lepš?
Kali muž utrymlivaje žonku — chatniuju haspadyniu, chaj jašče zapłacić za jaje padatak
«Kali muž dobra zarablaje i moža sabie dazvolić, kab žonka nie pracavała, i jany pryniali takoje rašeńnie, to 20 bazavych (padatak na darmajedstva) — nievialikaja suma, jaje možna i apłacić».
Biespracoŭnych treba zacisnuć jašče bolš
«Da nas pastupajuć prapanovy ab źmienie padychodaŭ da rehistracyi biespracoŭnych. I my budziem heta rabić. Havorka idzie pra toje, kab zakanadaŭstva ab zaniataści było mienš łajalnym da tych, chto svajo niežadańnie pracavać choča prykryć statusam biespracoŭnaha».
Nie treba skardzicca na nizkija piensii
«Pierš za ŭsio, treba vychoŭvać svaich dziaciej, jakija buduć vam potym dapamahać. Ja dumaju, što siamja zaŭsiody padtrymaje člena siamji. Heta raz. Dziaržava padtrymaje ŭ mieru mahčymaściaŭ».
Pracavać nie prymušajuć, ale padatak zapłacić pryjdziecca
«Nichto z hoładu nie pamre. Dapamohu pa biespracoŭi my nie płanujem pavialičvać. Kali ŭ čałavieka lažać miljony ŭ kasie, i jon na ich žyvie, jamu budzie nieskładana zapłacić 3 miljony 600 tysiač (padatak na darmajedstva). Jon karystajecca ŭsimi vyhodami dziaržavy. Nichto nikoha nie prymušaje pracavać. Kali zdaješ kvateru, płaciš padatki, kali łaska, dziakuj vam za heta, žyvicie jak chočacie — demakratyčnaje hramadstva».
Kamientary