U Miensku adbyłasia prezentacyja knihi Ludmiły Asipienki i Katažyny Kviatkoŭskaj «Kastusioŭ dziońnik». Kniha składajecca z 12 apovieściaŭ čatyrnaccaci studentaŭ, vymušanych siońnia navučacca ŭ Polščy. Heta «prostyja čałaviečyja historyi pra dziacinstva, zachapleńni, žyćciovy vybar, małyja i vialikija spravy».
Ideja napisańnia knihi paŭstała ŭ lipieni 2006 hodu ŭ internacie «Babilon», dzie padčas padrychtoŭčych letnich kursaŭ žyli ŭdzielniki prahramy imia Kastusia Kalinoŭskaha.
«Z Kasiaj ja paznajomiłasia ŭ Miensku, padčas jaje valantaryjatu ŭ miežach prahramy «Moładź», - raspaviadaje Ludmiła Asipienka pra svaju siabroŭku i suaŭtarku. Šmat što ŭ ich stasunkach jana ličyć niezvyčajnym i symbaličnym. Naprykład, toje, što 14 sakavika 2006 hodu Ludu adličyli z universytetu, a ŭnačy z 14 na 15 sakavika Kasiu nie ŭpuścili ŭ Biełaruś paśla paŭhadavoha pobytu za miažoj. Jość u ich i takaja supolnaja rysa, jak žadańnie rabić zadumanaje, nie zaležna ad materyjalnych abstavin. «Kastusioŭ dziońnik» — heta niekamercyjny prajekt, kniha raspaŭsiudžvajecca biaspłatna. Za jaje napisańnie aŭtarki nie atrymali nijakich hanararaŭ, rabili tamu, što sprava ich zachapiła.
Pra tvor i jaho hierojaŭ Ludmiła i Katažyna havorać: «My staralisia pakazać śviet ich vačyma i nazvali knihu dziońnikam. Kniha zbudavanaja nieliniejna, kožnaja historyja — heta ceły śviet, samastojny, niezaležny ad astatnich. Alo jość kropka, u jakoj usie hetyja historyi pierakryžavalisia — prahrama Kalinoŭskaha. Tamu i dziońnik mienavita Kastusioŭ. My nie budavali schiemaŭ, nie malavali šablonaŭ. Chaciełasia pakinuć prastoru dla razvažańniaŭ. Spadziajomsia, što nam heta ŭdałosia».
Kniha składajecca ź dźviuch častak. Adna ź ich — na polskaj movie, druhaja — na biełaruskaj i rasiejskaj. Takoje moŭnaje rašeńnie aŭtarki nazyvajuć nievypadkovym. «...Našaja Biełaruś — roznaja: strakataja, intelihientnaja tusoŭkavaja, h.d. Kab realistyčna pakazać sučasnuju biełaruskuju moładź u asobach našych hierojaŭ, dźviuchmoŭja nie paźbiehnuć,» — upeŭnienyja Luda i Kasia.
Padčas prezentacyi knihi ŭ Miensku biełaruskaja paetka Valaryna Kustava pračytała svoj vierš «Kalinoŭski ŭ džynsach», pravioŭšy paralel miž śmiełym vajarom i Ludmiłaj. Padabienstva i sapraŭdy jość: u natchnionaści, enerhičnaści, metaskiravanaści. Maładaja aŭtarka i studentka maje jašče bahata zadumaŭ.
Pra prezentacyju «Kastusiovaha dziońnika» i samu knihu Ludmiła Asipienka havoryć: «Ja pad vialikim uražańniem i ad prezentacyi, i ad refleksijaŭ maich siabroŭ i znajomych na knihu. Vielmi pryjemna było bačyć śvietłyja tvary tych, chto pryjšoŭ. Nia mienš rasčulili sms-ki ŭnačy ad dziaŭčat z majho byłoha ŭniversytetu, jakija za hety karotki čas prahłynuli knihu i navat płakali. Dla mianie vielmi važnaja MIENAVITA ICH acenka i pryznańnie. Biaźmiežna ŭdziačnaja siabroŭkam i siabram, jakija zrabili nievierahodnuju pracu pa padrychtoŭcy i arhanizacyi samoj prezentacyi, a taksama hurtam, jakija vystupili.
«Kastusioŭ dziońnik» - naša z Kasiaj pieršaja surjoznaja praca, i, naturalna, dla nas heta padzieja. Vielmi ciešyć, kali bačyš, što ludziam cikava i patrebna našaja kniha. Pra heta śviedčyć chacia b toje, što ekzemplaraŭ na ŭsich achvotnych atrymać u padarunak knihu nie chapiła».
Ludmiła i Katažyna zaprašajuć usich, chto žadaje paznajomicca z knihaj, zavitać na staronki www.pk.pl i www.studium.uw.edu.pl, dzie vykładzieny jaje elektronny varyjant.
Źviestki pra aŭtarak:
Ludmiła Asipienka
Vyvučaje kulturaznaŭstva ŭ Varšaŭskim universytecie.
Vypusknica Biełaruskaha Kalehijumu pa specyjalnaści žurnalistyka.
Z 2004 hodu aktyŭna ŭdzielničaje ŭ studenckim ruchu ŭ Biełarusi.
U sakaviku 2006 hodu ŭ pieršy dzień daterminovaha hałasavańnia na vybarach prezydenta RB z palityčnych matyvaŭ adličanaja z BDPU imia Maksima Tanka.
Katažyna Kviatkoŭska
Vyvučaje mižnarodnyja stasunki (specyjalnaść “Uschodaznaŭstva”) va ŭniversytecie imia Adama Mickieviča ŭ Poznani i biełaruskuju filalohiju ŭ Varšaŭskim universytecie.
Časta byvała ŭ Biełarusi: prachodziła stažyroŭki ŭ Biełaruskim instytucie pravaznaŭstva ŭ Miensku, supracoŭničała ŭ miežach eŭrapiejskaha valantaryjatu ź niezaležnymi moładzievymi arhanizacyjami.
U sakaviku 2006 hodu jak mižnarodnamu naziralniku ABSE joj admovili ŭ naviedvańni Biełarusi.
Stypendyjalnaja prahrama imia Kastusia Kalinoŭskaha była padpisanaja 30 sakavika 2006 hodu premjer-ministram Polščy Kazimiram Marcinkievičam i lideram bloku demakratyčnych siłaŭ Biełarusi Alaksandram Milinkievičam, a taksama pradstaŭnikami Kanferencyi rektaraŭ polskich VNU i Kanferencyi rektaraŭ polskich universytetaŭ. Kaardynujecca adździełam Prahramy pry Studyjumie Ŭschodniaj Eŭropy Varšaŭskaha ŭniversytetu.
Pieršapačatkova prahrama pryznačałasia dla studentaŭ, adličanych ź biełaruskich universytetaŭ, paśla pašyryłasia na asobaŭ, jakija z palityčnych matyvaŭ nia mohuć vučycca ŭ Biełarusi.