Каліноўскі ў джынсах

У Менску адбылася прэзэнтацыя кнігі Людмілы Асіпенкі і Катажыны Квяткоўскай «Кастусёў дзёньнік». Кніга складаецца з 12 аповесьцяў чатырнаццаці студэнтаў, вымушаных сёньня навучацца ў Польшчы. Гэта «простыя чалавечыя гісторыі пра дзяцінства, захапленьні, жыцьцёвы выбар, малыя і вялікія справы».

Ідэя напісаньня кнігі паўстала ў ліпені 2006 году ў інтэрнаце «Бабілён», дзе падчас падрыхтоўчых летніх курсаў жылі ўдзельнікі праграмы імя Кастуся Каліноўскага.

«З Касяй я пазнаёмілася ў Менску, падчас яе валянтарыяту ў межах праграмы «Моладзь», - распавядае Людміла Асіпенка пра сваю сяброўку і суаўтарку. Шмат што ў іх стасунках яна лічыць незвычайным і сымбалічным. Напрыклад, тое, што 14 сакавіка 2006 году Люду адлічылі з унівэрсытэту, а ўначы з 14 на 15 сакавіка Касю не ўпусьцілі ў Беларусь пасьля паўгадавога побыту за мяжой. Ёсьць у іх і такая супольная рыса, як жаданьне рабіць задуманае, не залежна ад матэрыяльных абставін. «Кастусёў дзёньнік» — гэта некамэрцыйны праект, кніга распаўсюджваецца бясплатна. За яе напісаньне аўтаркі не атрымалі ніякіх ганарараў, рабілі таму, што справа іх захапіла.

Пра твор і яго герояў Людміла і Катажына гавораць: «Мы стараліся паказаць сьвет іх вачыма і назвалі кнігу дзёньнікам. Кніга збудаваная нелінейна, кожная гісторыя — гэта цэлы сьвет, самастойны, незалежны ад астатніх. Алё ёсьць кропка, у якой усе гэтыя гісторыі перакрыжаваліся — праграма Каліноўскага. Таму і дзёньнік менавіта Кастусёў. Мы не будавалі схемаў, не малявалі шаблёнаў. Хацелася пакінуць прастору для разважаньняў. Спадзяёмся, што нам гэта ўдалося».

Кніга складаецца зь дзьвюх частак. Адна зь іх — на польскай мове, другая — на беларускай і расейскай. Такое моўнае рашэньне аўтаркі называюць невыпадковым. «...Нашая Беларусь — розная: стракатая, інтэлігентная тусоўкавая, г.д. Каб рэалістычна паказаць сучасную беларускую моладзь у асобах нашых герояў, дзьвюхмоўя не пазьбегнуць,» — упэўненыя Люда і Кася.

Падчас прэзэнтацыі кнігі ў Менску беларуская паэтка Валярына Кустава прачытала свой верш «Каліноўскі ў джынсах», правёўшы паралель між сьмелым ваяром і Людмілай. Падабенства і сапраўды ёсьць: у натхнёнасьці, энэргічнасьці, мэтаскіраванасьці. Маладая аўтарка і студэнтка мае яшчэ багата задумаў.

Пра прэзэнтацыю «Кастусёвага дзёньніка» і саму кнігу Людміла Асіпенка гаворыць: «Я пад вялікім уражаньнем і ад прэзэнтацыі, і ад рэфлексіяў маіх сяброў і знаёмых на кнігу. Вельмі прыемна было бачыць сьветлыя твары тых, хто прыйшоў. Ня менш расчулілі смс-кі ўначы ад дзяўчат з майго былога ўнівэрсытэту, якія за гэты кароткі час праглынулі кнігу і нават плакалі. Для мяне вельмі важная МЕНАВІТА ІХ ацэнка і прызнаньне. Бязьмежна ўдзячная сяброўкам і сябрам, якія зрабілі неверагодную працу па падрыхтоўцы і арганізацыі самой прэзэнтацыі, а таксама гуртам, якія выступілі.

«Кастусёў дзёньнік» - наша з Касяй першая сур’ёзная праца, і, натуральна, для нас гэта падзея. Вельмі цешыць, калі бачыш, што людзям цікава і патрэбна нашая кніга. Пра гэта сьведчыць хаця б тое, што экзэмпляраў на ўсіх ахвотных атрымаць у падарунак кнігу не хапіла».

Людміла і Катажына запрашаюць усіх, хто жадае пазнаёміцца з кнігай, завітаць на старонкі www.pk.pl i www.studium.uw.edu.pl, дзе выкладзены яе электронны варыянт.

Зьвесткі пра аўтарак:

Людміла Асіпенка

Вывучае культуразнаўства ў Варшаўскім унівэрсытэце.

Выпускніца Беларускага Калегіюму па спэцыяльнасьці журналістыка.

З 2004 году актыўна ўдзельнічае ў студэнцкім руху ў Беларусі.

У сакавіку 2006 году ў першы дзень датэрміновага галасаваньня на выбарах прэзыдэнта РБ з палітычных матываў адлічаная з БДПУ імя Максіма Танка.

Катажына Квяткоўска

Вывучае міжнародныя стасункі (спэцыяльнасьць “Усходазнаўства”) ва ўнівэрсытэце імя Адама Міцкевіча ў Познані і беларускую філялёгію ў Варшаўскім унівэрсытэце.

Часта бывала ў Беларусі: праходзіла стажыроўкі ў Беларускім інстытуце правазнаўства ў Менску, супрацоўнічала ў межах эўрапейскага валянтарыяту зь незалежнымі моладзевымі арганізацыямі.

У сакавіку 2006 году як міжнароднаму назіральніку АБСЭ ёй адмовілі ў наведваньні Беларусі.

Стыпэндыяльная праграма імя Кастуся Каліноўскага была падпісаная 30 сакавіка 2006 году прэм’ер-міністрам Польшчы Казімірам Марцінкевічам і лідэрам блёку дэмакратычных сілаў Беларусі Аляксандрам Мілінкевічам, а таксама прадстаўнікамі Канфэрэнцыі рэктараў польскіх ВНУ і Канфэрэнцыі рэктараў польскіх унівэрсытэтаў. Каардынуецца аддзелам Праграмы пры Студыюме Ўсходняй Эўропы Варшаўскага ўнівэрсытэту.

Першапачаткова праграма прызначалася для студэнтаў, адлічаных зь беларускіх унівэрсытэтаў, пасьля пашырылася на асобаў, якія з палітычных матываў ня могуць вучыцца ў Беларусі.

• 0
• 0
• 0
• 0
• 0
• 0
• 0
• 0