Łukašenka: Refarmavańnie AAN, ABSIE i inšych arhanizacyj užo nie prosta naśpieła, a pieraśpieła

 Alaksandr Łukašenka ličyć prablemu refarmavańnia mižnarodnych arhanizacyj daŭno naśpiełaj. Ab hetym jon zajaviŭ 21 lipienia na sustrečy sa staršynioj ABSIE, pieršym namieśnikam premjer-ministra — ministram zamiežnych spraŭ Sierbii Ivicam Dačyčam.

«Zhadziciesia, što rola nie tolki ABSIE, ale i inšych mižnarodnych arhanizacyj nastolki prynižanaja, što dalej užo niama kudy», — cytuje Łukašenku jaho pres-słužba. 

Na dumku kiraŭnika dziaržavy, refarmavańnie AAN, ABSIE i inšych arhanizacyj «užo nie prosta naśpieła, a pieraśpieła». «U advarotnym vypadku hetyja arhanizacyi akažucca prosta marhinalnymi strukturami, jakija ni na što nie buduć upłyvać», — skazaŭ jon.

«Mahčyma, Sierbii ŭdasca štości ŭ hetym kirunku zrabić. Kali vy zamachniaciesia choć u niejkaj častcy na vyrašeńnie hetaj prablemy, vy možacie raźličvać na naš udzieł», — dadaŭ Łukašenka.

Pry hetym jon padkreśliŭ, što adčuvaje dvaistaje staŭleńnie da ABSIE. Z adnaho boku, pavodle słoŭ Łukašenki, heta vielmi patrebnaja arhanizacyja, asabliva «siońnia, kali ŭ Jeŭropie faktyčna razhareŭsia vajenny kanflikt, faktyčna idzie vajna pamiž prociborstvujučymi bakami». «Z adnaho boku, patrebnaja arhanizacyja, jakaja pavinny adyhryvać značnuju rolu mienavita ŭ arhanizacyi biaśpieki i supracoŭnictva ŭ Jeŭropie, z druhoha boku — niedastatkovaja rola», — padkreśliŭ jon. 

U hetym Łukašenka bačyć vinu samoj arhanizacyi i najpierš kiraŭnikoŭ dziaržaŭ ABSIE. «Kali ŭžo vajna, to, napeŭna, u terminovym paradku pavinny byli sabracca kiraŭniki dziaržaŭ, abmierkavać hetu prablemu i pryniać niejkija miery, rašeńni. Nie atrymajecca — choć by ŭ vočy skazać usio toje, što adzin pra adnaho dumajuć. Pakul hetaha nie adbyvajecca», — adznačyŭ biełaruski kiraŭnik. 

U toj ža čas, dadaŭ jon, ABSIE «sprabuje» i robić nieabchodnaje dla ŭrehulavańnia kanfliktu na ŭschodzie Ukrainy, nakolki heta mahčyma. «Ale, kaniešnie, z tymi paŭnamoctvami, jakija ABSIE siońnia maje, nie majučy impulsu ad kiraŭnikoŭ dziaržaŭ, naŭrad ci ABSIE ŭ hetaj situacyi moža štości zrabić», — padkreśliŭ Łukašenka. 

Tamu, ličyć jon, i źjaŭlajucca novyja farmaty pieramoŭ: narmandskija, bierlinskija, minskija i inšyja. «Usio heta mahło ŭmiaścicca ŭ adnoj arhanizacyi — ABSIE, i heta jaje funkcyja», — zajaviŭ kiraŭnik dziaržavy.

U svaju čarhu Ivica Dačyč adznačyŭ, što Biełaruś uniesła vielizarny ŭkład u mirny praces, bo ŭ Minsku sustrakajucca trochbakovaja kantaktnaja hrupa i jaje rabočyja padhrupy, dasiahajucca šmatlikija damoŭlenaści, pahadnieńni.

Jon adznačyŭ, što Sierbija, źjaŭlajučysia staršynioj ABSIE, starajecca maksimalna prykłaści namahańni, kab palityčny praces raźvivaŭsia, asabliva ŭ pytańniach, źviazanych z Ukrainaj, ale pry hetym nie zabyvaje i pra inšyja zamarožanyja kanflikty ŭ Jeŭropie.

Havoračy pra biełaruska-sierbskija adnosiny, Dačyč padkreśliŭ, što jany vielmi družalubnyja. «My prychilnyja raźvićciu našych adnosin va ŭsich śfierach: palityčnaj, ekanamičnaj, navukova-kulturnaj, adukacyi, unutranych spraŭ, abarony», — skazaŭ jon.

Ivica Dačyč taksama pieradaŭ kiraŭniku dziaržavy pryvitańnie ad prezidenta Sierbii Tamisłava Nikaliča i premjer-ministra hetaj krainy Alaksandra Vučyča, paviedamlaje pres-słužba.

• 0
• 0
• 0
• 0
• 0
• 0
• 0
• 0