Jeŭrazijski fond stabilizacyi i raźvićcia (JEFSR) abmiarkoŭvaje ź Biełaruśsiu novuju prahramu dapamohi na 3 miljardy dołaraŭ, zajaviŭ žurnalistam u Maskvie namieśnik ministra finansaŭ Rasii Siarhiej Storčak.
Ministr finansaŭ RF Anton Siłujanaŭ u pačatku lipienia paviedamiŭ, što Biełaruś źviarnułasia da Rasii pa novy kredyt na 3 miljardy dołaraŭ i ŭłady prapracoŭvajuć hetaje pytańnie.
Storčak rastłumačyŭ, što havorka pra vydzialeńnie kredytu ź biudžetu RF nie idzie. «Jany (Biełaruś) chacieli adnavić adnosiny i ŭzhadnić novuju prahramu (z fondam JEFSR)», — pieradaje RIA Novosti słovy Storčaka sa spasyłkaj na Prajm.
«Pieršaje abmierkavańnie adbyłosia. Ekśpierty fondu, Minfina i centrabanka respubliki praciahnuć kantakty i pačnuć uzhadniać paramietry matrycy. Pra toje, kab naŭprost ź fiederalnaha biudžetu (RF), havorka nie išła», — padkreśliŭ namieśnik ministra.
Jak raniej paviedamlałasia, u sakaviku Biełaruś nakiravała zajaŭku na atrymańnie novaha kredytu ŭ Antykryzisnaha fondu JeŭrAzES, jaki ŭ červieni byŭ pierajmienavany ŭ Jeŭrazijski fond stabilizacyi i raźvićcia. Finansavańnie fondu biełaruski bok žadaje atrymać na padtrymku stabilizacyjnaj prahramy ŭrada i Nacyjanalnaha banka na 2015—2017 hady.
U lipieni saviet JEFSR daručyŭ dapracavać matrycu ekanamičnych reform Biełarusi, jakaja moža być padtrymanaja finansavym kredytam. Saviet fondu adznačyŭ najaŭnaść ryzykaŭ pa dasiahnieńni met reformaŭ, źnižeńnie jakich patrabuje bolš rašučych mier. Heta, pieršym čynam, tyčycca mier, skiravanych na dasiahnieńnie i padtrymańnie makraekanamičnaj stabilizacyi na fonie płanaŭ pa libieralizacyi cen i rynkaŭ, nieabchodnych dla stvareńnia ŭmoŭ ustojlivaha ekanamičnaha rostu ŭ siarednieterminovaj i doŭhaterminovaj pierśpiektyvie. Dapracavać matrycu ekanamičnych mier pa kredytnaj prahramie płanujecca ŭ najbližejšyja dva-try miesiacy, kab saviet fondu zmoh ich razhledzieć na svaim čarhovym pasiadžeńni ŭ druhim paŭhodździ hetaha hoda.
Kamientary