Еўразійскі фонд стабілізацыі і развіцця (ЕФСР) абмяркоўвае з Беларуссю новую праграму дапамогі на 3 мільярды долараў, заявіў журналістам у Маскве намеснік міністра фінансаў Расіі Сяргей Сторчак.
Міністр фінансаў РФ Антон Сілуянаў у пачатку ліпеня паведаміў, што Беларусь звярнулася да Расіі па новы крэдыт на 3 мільярды долараў і ўлады прапрацоўваюць гэтае пытанне.
Сторчак растлумачыў, што гаворка пра выдзяленне крэдыту з бюджэту РФ не ідзе. «Яны (Беларусь) хацелі аднавіць адносіны і ўзгадніць новую праграму (з фондам ЕФСР)», — перадае РИА Новости словы Сторчака са спасылкай на Прайм.
«Першае абмеркаванне адбылося. Эксперты фонду, Мінфіна і цэнтрабанка рэспублікі працягнуць кантакты і пачнуць узгадняць параметры матрыцы. Пра тое, каб наўпрост з федэральнага бюджэту (РФ), гаворка не ішла», — падкрэсліў намеснік міністра.
Як раней паведамлялася, у сакавіку Беларусь накіравала заяўку на атрыманне новага крэдыту ў Антыкрызіснага фонду ЕўрАзЭС, які ў чэрвені быў перайменаваны ў Еўразійскі фонд стабілізацыі і развіцця. Фінансаванне фонду беларускі бок жадае атрымаць на падтрымку стабілізацыйнай праграмы ўрада і Нацыянальнага банка на 2015—2017 гады.
У ліпені савет ЕФСР даручыў дапрацаваць матрыцу эканамічных рэформ Беларусі, якая можа быць падтрыманая фінансавым крэдытам. Савет фонду адзначыў наяўнасць рызыкаў па дасягненні мэт рэформаў, зніжэнне якіх патрабуе больш рашучых мер. Гэта, першым чынам, тычыцца мер, скіраваных на дасягненне і падтрыманне макраэканамічнай стабілізацыі на фоне планаў па лібералізацыі цэн і рынкаў, неабходных для стварэння ўмоў устойлівага эканамічнага росту ў сярэднетэрміновай і доўгатэрміновай перспектыве. Дапрацаваць матрыцу эканамічных мер па крэдытнай праграме плануецца ў найбліжэйшыя два-тры месяцы, каб савет фонду змог іх разгледзець на сваім чарговым пасяджэнні ў другім паўгоддзі гэтага года.
Пасля выступлення Луганскага тэатра ў Мінску адна з глядачак выгукнула «Слава Украіне!»5
Каментары