«Haziecie Słonimskaj» šyjuć źniavahu honaru i hodnaści prezidenta
U dačynieńni da jurydyčnaj asoby, na jakuju ŭskładzienyja funkcyi redakcyi «Haziety Słonimskaj», zaviali administracyjnuju spravu pavodle art. 23.33 Kodeksu ab administracyjnych parušeńniach — «raspaŭsiud zaviedama iłžyvych źviestak, što źnievažajuć honar i hodnaść prezydenta Respubliki Biełaruś».
5 žniŭnia hałoŭnaha redaktara «Haziety Słonimskaj» vyklikali ŭ rajonnuju milicyju. Padstavaj staŭ artykuł Hanny Vaładaščuk «Hołas ź vioski. Hałoŭnaje, što havaryć prezydent dobra ŭmieje» (numar ad 29 lipienia, rubryka «Vybary-2015»).
Hałoŭny redaktar vydańnia Viktar Vaładaščuk pad pratakoł davać pakazańni admoviŭsia, skazaŭ, što vyklik u milicyju dla jaho niečakany. Milicyjanty adkłali razmovu.
«Publikacyja zasnavanaja na apytańni žycharoŭ adnoj ź viosak u Słonimskim rajonie na temu vybaraŭ. Jaki kankretny frahment artykuła staŭ nahodaj dla zaviadzieńnia spravy, mnie nie paviedamili. Ale ŭ nas jość dyktafonny zapis usiaho apytańnia, pryčym u artykuł uvajšło daloka nia ŭsio. Było skazana šmat čaho, ale my vybrali najbolš cikavyja, na naš pohlad, momanty. Pryčym ludzi vykazvalisia nie ananimna, a nazyvali svaje imiony i proźviščy.
Nam užo viadoma, što viaskoŭcaŭ, jakija vykazvali svaje mierkavańni našamu karespandentu, užo apytali pad pratakoł, ź imi sustrakaŭsia supracoŭnik milicyi, jakomu jany davali tłumačeńni. Tak što praces pajšoŭ, jak kažuć».

Jak patłumačyli jurysty, niedziaržaŭnamu vydańniu moža pahražać štraf da 500 bazavych vieličyniaŭ (90 miljonaŭ rubloŭ) za «raspaŭsiud zaviedama iłžyvych źviestak, što źnievažajuć honar i hodnaść prezydenta Respubliki Biełaruś».
U 2002 hodzie za abrazu honaru i hodnaści prezydenta žurnalisty haradzienskaj hazety «Pahonia» Mikoła Markievič i Pavał Mažejka byli asudžanyja da 2 i 2,5 hoda abmiežavańnia voli (tak zvanaj «chimii»). U tym ža hodzie redaktara hazety «Rabočy» Viktara Ivaškieviča asudzili na 2 hady «chimii».
U 2011 hodzie za abrazu prezydenta Biełarusi na try z pałovaj hady z adterminoŭkaj vykanańniaprysudu byŭ asudžany Andrej Pačobut. U 2012 haradzienskaja abłasnaja prakuratura zaviała suprać jaho novuju spravu za abrazu prezydenta (častka 1 artykuła 368 Kryminalnaha kodeksu RB), a taksama za paklop na prezydenta (častka 1 artykuła 367 Kryminalnaha kodeksu RB), ale potym kryminalnuju spravu zakryli.
Kamientary