Pravaabarončy centr «Viasna» zaklikaje spynić kryminalny pieraśled pa č. 2 art. 339 Kryminalnaha kodeksu Respubliki Biełaruś («Złosnaje chulihanstva») u dačynieńni da Viačasłava Kasinierava, Jarasłava Uljanienkava, a taksama da zatrymanych Maksima Piakarskaha, Vadzima Žaromskaha, i nieadkładna vyzvalić ich z-pad varty.
Jak stała viadoma Pravaabarončamu centru «Viasna», 11 žniŭnia 2015 hoda supracoŭnikami MUS byli zatrymanyja piaciora moładzievych aktyvistaŭ: Maksim Piakarski, Vadzim Žaromski, Viačasłaŭ Kasinieraŭ, Jarasłaŭ Uljanienkaŭ i hramadzianin Rasijskaj Fiederacyi Pavieł (proźvišča nie viadomaje). Dvoje apošnich byli paźniej vyzvalenyja pad padpisku ab niavyjedzie, a ŭ dačynieńni da M. Piakarskaha, V. Žaromskaha była abranaja miera strymańnia ŭ vyhladzie ŭtrymańnia pad vartaj da pradjaŭleńnia abvinavačvańnia. V. Kasinieraŭ znachodzicca pad vartaj u špitali, u jaki jon byŭ źmieščany z padvojnym pierałomam skivicy paśla zatrymańnia supracoŭnikami MUS.
Padstavaj dla kryminalnaha pieraśledu i źmiaščeńnia pad vartu da pradjaŭleńnia abvinavačvańniaŭ dadzienych maładych ludziej stała ŭzbudžeńnie Upraŭleńniem Śledčaha kamiteta Respubliki Biełaruś pa h. Minsku kryminalnaj spravy pa č. 2 art. 339 KK Respubliki Biełaruś («Złosnaje chulihanstva») pa fakcie naniasieńnia hrafici palityčnaha źmiestu na płocie kala budynka pa zav. Alšeŭskaha i na budynku byłoj vajskovaj častki pa vuł. Łyńkova, i art. 341 KK Respubliki Biełaruś («Apahańvańnie zbudavańniaŭ i psavańnie majomaści») — pa fakcie psavańnia majomaści indyvidualnaha pradprymalnika (bih-borda z vyjavaj supracoŭnikaŭ milicyi) pa vuł. Hareckaha ŭ h. Minsku.
U suviazi z hetym Pravaabarončy centr «Viasna» adznačaje nastupnaje:
- Napisańnie hrafici s nadpisam «Biełaruś maje być biełaruskaj» z vyjavaj biełaruskaha arnamientu, pierakreślenych svastyki i siarpa z mołatam, a taksama z nadpisam «Revalucyja śviadomaści, jana ŭžo idzie…» z vyjavaj čałavieka z butelkaj u rucie, nie majuć na mecie parušeńnia hramadskaha paradku i nie vykazvajuć jaŭnaj niepavahi da hramadstva, nie ŭtrymlivajuć prapahandu nacyjanalnaj, relihijnaj, rasavaj, sacyjalnaj ci inšaj varožaści. Charaktar i źmiest učynienych nadpisaŭ śviedčyć ab adsutnaści chulihanskich matyvaŭ u dziejańniach asobaŭ, jakija ich učynili i, adpaviedna, ab adsutnaści składu złačynstva, praduhledžanaha č. 2. art. 339 KK Respubliki Biełaruś.
- Raśledvańnie kryminalnaj spravy, uzbudžanaj pa prykmietach art. 341 KK Respubliki Biełaruś, pavinna adbyvacca ŭ miežach, vyznačanych Kryminalnym i Kryminalna-pracesualnym kodeksami Respubliki Biełaru z ulikam taho, što dadzienaje złačynstva adnosicca da katehoryi złačynstvaŭ, jakija nie ŭjaŭlajuć vialikaj hramadskaj niebiaśpieki i nie praduhledžvaje mahčymaści ŭtrymańnia pad vartaj padazravanych u jaho ździajśnieńni. Akramia taho, pytańnie ab kampiensacyi naniesnaj škody moža być razhledžana ŭ hramadzianska-pravavym paradku.
- Dziejańni supracoŭnikaŭ MUS, jakija ažyciaŭlali zatrymańnie ŭkazanych asobaŭ z vykarystańniem fizyčnaj siły i śpiecsrodkaŭ, nasili vidavočna niepraparcyjny i žorstki charaktar i pryčynili fizičnyja paškodžańni zatrymanym.
Pravaabarončy centr «Viasna» zajaŭlaje, što:
- utrymańnie M. Piakarskaha i V. Žaromskaha pad vartaj pa padazreńni ŭ ździajśnieńni imi złosnaha chulihanstva źjaŭlajecca niezakonnaj i niepraparcyjnaj mieraj;
- utrymańnie pad vartaj M. Piakarskaha i V. Žaromskaha ažyciaŭlajecca pry adsutnaści składu złačynstva, praduhledžanaha č.2 art. 339 KK u ich dziejańniach;
- najaŭnaść palityčnych matyvaŭ u dziejańniach orhanaŭ dziaržaŭnaj ułady, skiravanych na ŭmacavańnie ŭłady subjektami ŭładnych paŭnamoctvaŭ, dazvalajuć kvalifikavać M.Piakarskaha i V. Žaromskaha jak palityčnych źniavolenych;
- hetyja dziejańni ŭładaŭ adbyvajucca ŭ pieryjad praviadzieńnia prezidenckaj vybarčaj kampanii, nosiać demanstratyŭny charakar i vidavočna majuć na mecie praduchileńnie mahčymych akcyj hramadzianskaj aktyŭnaści, asabliva ŭ moładzievym asiarodku.
Pravabarončy centr «Viasna» patrabuje:
- nieadkładna pierahledzić pryniatyja ŭ dačynieńni da M. Piakarskaha i V. Žaromskaha pracesualnyja miery, skiravanyja na ich izalacyju, i vyzvalić ich z-pad varty;
- spynić kryminalny pieraśled M.Piakarskaha, V. Žaromskaha, V.Kasinierava, Ja. Uljanienkava pa č. 2 art. 339 KK Respubliki Biełaruś u suviazi z adstutnaściu składu dadzienaha złačynstva ŭ ich dziejańniach;
- harantavać vykanańnie ŭsich pracesualnych pravoŭ na pieryjad viadzieńnia raśledvańnia, u tym liku prava na abaronu i svabodu ad žorstkaha i biesčałaviečnaha abychodžańnia;
- pravieści naležnaje raśledvańnie faktaŭ žorstkaha i biesčałaviečnaha abychodžańnia ŭ dačynieńni da zatrymanych i pryciahnuć vinavatych da ŭstanoŭlenaj zakonam adkaznaści.
Čytajcie: