Paet, lidar stvaranaha hramadskaha ruchu «Za dziaržaŭnaść i niezaležnaść Biełarusi» Uładzimir Niaklajeŭ paviedamiŭ BiełaPAN, što akcyju «Za mirnuju, niejtralnuju Biełaruś!», jakuju inicyjuje arhkamitet ruchu, płanujecca pravieści «bližej da vybaraŭ, prykładna za tydzień da dnia hałasavańnia».
13 vieraśnia arhkamitet raspaŭsiudziŭ zajavu z prapanovaj u miežach vybarčaj kampanii pravieści akcyju «Za mirnuju, niejtralnuju Biełaruś!».
«Z apošnich dziejańniaŭ kiraŭnictva Rasijskaj Fiederacyi ŭsio bolš vidavočna, što Rasija maje namier pieratvaryć Biełaruś nie prosta ŭ svaju kałoniju, čaho z-za palityki ciapierašniaha biełaruskaha režymu jana praktyčna dabiłasia, a ŭ svaju vajennuju bazu. Heta supiarečyć nie tolki Kanstytucyi Respubliki Biełaruś, zhodna ź jakoj Biełaruś — niejtralnaja dziaržava. Heta stavić pad realnuju pahrozu biaśpieku krainy i samo žyćcio biełarusaŭ», — havorycca ŭ zajavie.
«My płanujem pravieści pikiet abo mitynh. Zaraz ja viadu pieramovy z tymi apazicyjnymi strukturami i hramadskimi arhanizacyjami, chto moh by dałučycca da hetaj akcyi, kab jana była jak maha bolš masavaj. Mienavita dla hetaha, masavaści i rezanansu, niadrenna było b, kab jana była sankcyjanavanaj», — skazaŭ Niaklajeŭ.
Na jaho dumku, «prablema raźmiaščeńnia na terytoryi Biełarusi vajennych baz, prablema militaryzacyi Biełarusi — heta niepasrednaja pahroza niezaležnaści».
Kamientary