Čamu Hajdukievič padčas zvarotu hladzieŭ to ŭ kamieru, to naprava VIDEA
Padčas vystupu ŭdzielnika prezidenckaj kampanii Siarhieja Hajdukieviča na Biełaruś-1 niekatoryja źviarnuli ŭvahu, što jahonyja vočy ŭvieś čas biehali. To jon hladzieŭ u kamieru, to raptam naprava. Spačatku padałosia, što televizijonščyki niaŭdała pastavili suflor, ale adkaz prazaičniejšy.
«Było dźvie kamiery, tamu davodziłasia ŭvieś čas hladzieć to ŭ adnu, to ŭ inšuju», — skazaŭ Siarhiej Hajdukievič.
Adnak pry hetym pramoŭcu amal uvieś čas pakazvali «ŭ łob», nie vykarystoŭvajučy pravuju kamieru.
Lehiendarnaja dyktarka biełaruskaha telebačańnia Zinaida Bandarenka vykazała «Našaj Nivie» zdahadku, što pravaruč ad Hajdukieviča moh stajać peŭny «dyryžor», jaki b padbadziorvaŭ Siarhieja. Maŭlaŭ, było zaŭvažna, što pramoŭca chvalujecca.
Ale hetuju viersiju sam kandydat u prezidenty abviarhaje.
«Nu vy što, jakija chvalavańni? Ja ž mahu dźvie hadziny, piać hadzin havaryć! Vy tolki papierku mnie pakładzicie na stoł, kab ja viedaŭ, pra što», — skazaŭ Siarhiej Hajdukievič, zaznačyŭšy, što jon čytaŭ tekst z papierki, jakaja lažała na stale.
Suflora pry hetym nie było.
«A pra łozunh «Žyvie Biełaruś» ja tak skažu — heta moj łozunh! Ja jaho kazaŭ i ŭ 2001 hodzie, i ŭ 2006. Nielha kazać, što heta słovy tolki radykalnaj apazicyi. Hetyja słovy pavinny nas jadnać», — upeŭnieny Hajdukievič.
Ahułam u časie svajho televystupu, adnak, Siarhiej Hajdukievič ni słovam nie pakrytykavaŭ Alaksandra Łukašenku, ale raz u raz napadaŭ na apazicyju i nastojliva vystupaŭ suprać lubych akcyj pratestu.
Jon zajaviŭ, što apazicyja moža «prynieści biadu ŭ našy siemji». «Ja nikoli nie pakliču na Płošču rabić revalucyju. Dla mianie heta niedapuščalna», — zajaviŭ Hajdukievič.
Jarkim momantam vystupu kandydata stali i nastupnyja słovy: «Skažu vam česna i ščyra — u krainie šmat dobraha zroblena za hetyja hady. Chaču skazać vialiki dziakuj Alaksandru Ryhoraviču Łukašenku…»
Ciapier čytajuć
«Jana zabrała dziaciej i viarnułasia ŭ Minsk»: historyja biełarusa, jaki emihravaŭ u Barsiełonu ź siamjoj, a zastaŭsia adzin14
Kamientary