Čamu vynik vybaraŭ nie budzie adroźnivacca ad papiarednich?

Hałasavańnie ŭ 2012 hodzie. Fota Siarhieja Hudzilina.

Padčas prezidenckich vybaraŭ miljanier Pavieł Tapuzidzis budzie asabista ličyć hałasy na ŭčastku ŭ škole №199 na vulicy Pimiena Pančanki.

Prabiahajusia vačyma pa składzie kamisii, i zrok vychoplivaje niazvykłaje dla Biełarusi proźvišča «Papandopuła». Stop. Takoje samaje proźvišča ja bačyŭ, hartajučy skład vybarčych kamisii na papiarednich vybarach.

Tak i jość. I tady, i ciapier na ŭčastku ŭ škole №199 pracuje Taćciana Papandopuła ad dabračynnaha Biełaruskaha fondu miru.

Bolš za toje, usie (!) 13 čałaviek, jakija ličyli hałasy na parłamienckich vybarach 2012 hoda i miascovych vybarach 2014 hoda, ciapier buduć ličyć hałasy na prezidenckich. Nivodnaha novaha imia! Nadzvyčaj arhanizavanaja hrupa.

U paraŭnańni z parłamienckimi vybarami jakija-nijakija źmieny ŭ śpisie jość, ale datyčycca jany tolki pracesu vyłučeńnia. Niekatoryja členy kamisii ciapier zapisanyja ad inšych arhanizacyj.

Andrej Barbarčyk tady vyłučaŭsia ŭ jakaści pradstaŭnika BRSM. Ciapier jon budzie ličyć hałasy ad Biełaruskaj ahrarnaj partyi.

Volhu Ramanavu ŭ 2012 vyłučała ŭ kamisiju buchhałteryja «Karony» (hipiermarkieta, jaki naležyć Tapuzidzisu). Paśla jana stała zapisvacca ad Biełaruskaj asacyjacyi šmatdzietnych baćkoŭ.

Jašče adzin stabilny «ličylnik» — Alaksandr Skubakoŭ. Raniej jamu davodziłasia źbirać podpisy hramadzian, kab trapić u kamisiju. Ciapier jon vyłučeniec ad rajonnaha adździaleńnia Biełaruskaha hramadskaha abjadnańnia vieteranaŭ.

Astatnija siabry kamisii raźmierkavanyja pa hramadskich arhanizacyjach i partyjach, jakija adkryta padtrymlivajuć uładu.

Pradstaŭlenyja try prałukašenkaŭskija partyi: Respublikanskaja partyja pracy i spraviadlivaści, Biełaruskaja sacyjalna-spartyŭnaja partyja i Kamunistyčnyja partyja Biełarusi.

I jašče piać hramadskich arhanizacyj: «Biełaja Ruś», Biełaruski sajuz žančyn, Biełaruski fond miru, Biełaruskaje tavarystva «Čyrvony Kryž» i Biełaruski sajuz aficeraŭ.

Zhadajem pajmienna tych, chto budzie ličyć hałasy žycharoŭ Sucharava. Heta Alaksandr Kazancaŭ, Volha Kisialova, Viktoryja Łapšova, Taćciana Papandopuła, Piatro Saŭčanka, Siarhiej Taraniuk, Fiodar Čarniak, Valancina Šaramiet, Ivan Šor.

Jak raniej pravodziŭsia imi i ich kalehami padlik hałasoŭ?

«Praces značna pahoršyŭsia padčas padliku hałasoŭ, — havorycca ŭ zaklučeńni ABSIE pa nazirańni za parłamienckimi vybarami 2012 hoda. — Naziralniki, jakim nie była pradastaŭlena naležnaja mahčymaść nazirać za padlikam, acanili praces admoŭna ŭ značnaj kolkaści ŭčastkaŭ, dzie pravodziłasia nazirańnie».

U Lidzii Jarmošynaj zapytalisia, čamu ŭ vybarčyja kamisii nie biaruć pradstaŭnikoŭ apazicyi. Staršynia Centrvybarkama patłumačyła heta… kanfliktnaściu niazhodnych ź dziejučaj uładaj.

«U nas idzie adbor, to bok z usich pradstaŭlenych vybirajucca najbolš prydatnyja kandydaty. Hetak ža, jak kiraŭnik pradpryjemstva vybiraje sabie rabotnikaŭ na pradpryjemstva na konkursnaj asnovie. Heta ludzi, jakija dobra viadomyja ŭ hramadstvie sa stanoŭčaha boku, mienavita na takich ludziej abapirajucca i ŭ pracoŭnych kalektyvach, i ŭ hramadskaj pracy. Apazicyi nieabchodna pryciahvać prystojnych, zakonapasłuchmianych hramadzian, jakija majuć dobruju pracoŭnuju bijahrafiju, dobryja hramadskija suviazi, i tady ŭsio budzie ŭ paradku», — zajaviła Jarmošyna.

Na parłamienckich vybarach 2012 hoda karespandent «Našaj Nivy» naziraŭ za padlikam hałasoŭ na ŭčastku ŭ siaredniaj škole №7 Minska. Hety ŭčastak uvajšoŭ u akruhu, dzie apazicyja ładziła pakazalny bajkot.

Pavialičyć

Dastakovaj jaŭki tady nie było, ale heta nie pieraškodziła kamisii zajavić, što prahałasavała 58% vybarcaŭ.

Z 13 členaŭ kamisii, jakija pracavali tady, 11 čałaviek buduć ličyć hałasy i sioleta. Jakuju ličbu jaŭki ahučać jany?

• 0
• 0
• 0
• 0
• 0
• 0
• 0
• 0