Premjer-ministr Hruzii Iraklij Harybašvili adpraviŭ ukrainskamu prezidentu Piatru Parašenku list u suviazi z zapisami telefonnych razmoŭ byłoha prezidenta Hruzii, a ciapier hubiernatara Adesy Michaiła Saakašvili, jakija źjavilisia raniej u internecie.
Pavodle paviedamleńnia pres-słužby hruzinskaha premjera, Harybašvili źviartajecca da Parašenki z prośbaj źviarnuć uvahu na hetuju historyju.
«Kiraŭnik hruzinskaha ŭrada vykazvaje zaniepakojenaść u suviazi z tym, što telefonnaja razmova Michaiła Saakašvili z byłym kiraŭnikom Rady nacyjanalnaj biaśpieki i hienieralnym dyrektaram telekampanii «Rustavi-2» źmiaščaje zajavy, nakiravanyja suprać ciapierašniaha ŭrada Hruzii, i kankretnyja zakliki da antydziaržaŭnych, hvałtoŭnych dziejańniaŭ», — havorycca ŭ paviedamleńni.
Pavodle paviedamleńnia, Harybašvili adznačyŭ, što padobnyja dziejańni nie adpaviadajuć siabroŭskim adnosinam pamiž Ukrainaj i Hruzijaj, i hetyja zakliki mohuć stvaryć pahrozu biaśpiecy i stabilnaści Hruzii.
Na aŭdyjozapisach, jakija źjavilisia ŭ internecie na minułym tydni, jak miarkujecca, Saakašvili kaža adnamu ź lidaraŭ apazicyjnaha Adzinaha Nacyjanalnaha Ruchu i hiendyrektaru telekampanii «Rustavi-2», doli jakoj na dadzieny momant praz sud sprabuje viarnuć adzin z byłych uładalnikaŭ, što sud prymie rašeńnie, u tym liku i pa častcy vykanańnia.
Saakašvili kaža pra toje, što treba padrychtavać barykady i znajści «bajevikoŭ» dla «abarony» telekampanii.
«Rustavi-2» źjaŭlajecca vysokarejtynhavym telekanałam u Hruzii, jaki adroźnivajecca rezkaj krytykaj na adras uładaŭ.
Telekanał niaredka stanaviŭsia abjektam abvinavačvańniaŭ u słužeńni intaresam Adzinaha Nacyjanalnaha Ruchu z boku ciapierašnich uładaŭ.
Pradstaŭniki ŭładaŭ nazyvajuć toje, što adbyvajecca vakoł «Rustavi-2», pryvatnaj sprečkaj pamiž byłymi i ciapierašnimi ŭładalnikami telekanała, ale kiraŭnictva telekampanii i častka apazicyi ličać, što za sudovym pracesam staić baraćba uładaŭ z krytyčna nastrojenym telekanałam.
Ciapier čytajuć
«Ja jechała ad vajny i bambiožak»: Jaŭhienija Čarniaŭskaja pra pierajezd na Kipr8
Kamientary