Snapkoŭ: Jość adnaznačnaje rašeńnie pra paśladoŭnyja evalucyjnyja źmieny na asnovie pierajemnaści

U Minsku pačaŭ pracu štohadovy Kastryčnicki ekanamičny forum. U im tradycyjny biaruć udzieł najbolš adkrytyja hramadstvu pradstaŭniki vierchniaha ešałonu ŭłady. U sioletniaj prahramie vystupy namieśnika kiraŭnika Administracyi prezidenta Mikałaja Snapkova, pamočnika prezidenta Kiryła Rudaha i vice-premjera Vasila Maciušeŭskaha.

Fota Siarhieja Hudzilina

Pieršym adstralaŭsia Snapkoŭ. Hałoŭny tezis jaho vystupu na adkryćci kanfierencyi — nieabchodnaść źmieny pryncypaŭ kiravańnia ekanomikaj i adychodu ad ciapierašniaj viertykali. Maŭlaŭ, urad maje adnyja mety i płanavyja pakazčyki, rajonnaje kiraŭnictva — inšyja, a ŭ pradpryjemstva — trecija.

«Kali metaŭ mnoha — to niama nivodnaj. A meta pavinna być adzinaj. Naprykład, stvareńnie novych pracoŭnych miescaŭ», — udakładniŭ Snapkoŭ, adkazvajučy na pytańni žurnalistaŭ.

Mižvoli zhadałasia pieradvybarčaja prahrama AHP, jakuju staranna plažyli dziaržaŭnyja prapahandysty.

— I kali hetaja meta budzie vyznačanaja? — zapytalisia ŭ Snapkova.

— Ja liču, što jana pavinna być vyznačanaja ŭradam u prahramie raźvićcia na 2016—2020 hady, bo heta ekanamičnaja meta. A palityčnaj mety my dasiahnuli: prezident abrany, — zaŭśmichaŭsia Snapkoŭ.

U rukach jon trymaŭ ajpad — pakul jašče niazvykły vyhlad dla biełaruskaha čynoŭnika.

— Vy možacie adnaznačna skazać, usio ž buduć reformy ŭ krainie, ci nie?

— A vy možacie adnaznačna skazać, što jany nie prachodziać? — adkazaŭ pytańniem na pytańnie Snapkoŭ.

Čynoŭnik trymaŭsia raźniavolena i navat sprabavaŭ žartavać. Aficyjant pradstaŭničaha «Dypsiervis Choła» (byłoj rezidencyi Łukašenki ŭ Vajskovym zavułku), dzie prachodziła mierapryjemstva, nastolki zachapiŭsia pramovaj, što adkłaŭ pracu ŭ bok i słuchaŭ Snapkova.

— Mahu. Reformy nie prachodziać. U krainie ničoha nie mianiajecca. Kryzis u krainie zastajecca apošnija piać hadoŭ, — upeŭniena zajaviła Snapkovu žurnalistka «Kamsamołki».

— Heta nasamreč vielmi składanaja katehoryja i skazać adnaznačna, prachodziać ci nie prachodziać reformy, nielha.

Jość peŭnyja ahulnaviadomyja źniešnija prykmiety reformaŭ, naprykład, piensijnaja sistema ci taryfy ŽKH. Ale na moj pohlad, hałoŭnaje — ci pravodziacca reformy ŭ śviadomaści. Heta hatoŭnaść nasielnictva i elit hramadstva źmianiacca samim i źmianiać svajo žyćcio. U jaje asnovie — rost dabrabytu. Nie tolki asabistaha, ale i hatoŭnaść kožnaha pracavać na dabrabyt krainy. U nas heta niama ŭ hramadstvaje ci jość? — skončyŭ jon svaju pramovu.

Achvotnych adkazać na taki fiłasofski pasył nie znajšłosia.

— Voś bačycie! — zaśmiajaŭsia Snapkoŭ. Padałosia, što jon troški zabłytaŭsia sam.

— Ja vas pravilna razumieju, što niama adnaznačnaha rašeńnia, ci budzie kraina pravodzić reformy?

— Jość adnaznačnaje rašeńnie pra paśladoŭnyja evalucyjnyja źmieny na asnovie pierajemnaści. I biez łomki.

Snapkoŭ staŭ raskazvać pra daśledavańni Harvardskaha ŭniviersiteta pra ahresiŭnuju pryvatyzacyju. Jon pieraličyŭ niehatyŭnyja nastupstvy — zapavolvańnie ekanamičnaha rostu na bližejšyja hady, a taksama rost śmiarotnaści, u tym liku suicydalnaj, asabliva siarod mužčyn praduktyŭnaha ŭzrostu. Ź jahonych słovaŭ vynikała, što varyjant terminovych reformaŭ uładaj pakul nie razhladajecca.

Ale jakija reformy najbolš nieabchodnyja mienavita ciapier?

Snapkoŭ zadumaŭsia. «Pieršaje — heta padzieł dziaržavy jak ułaśnika i dziaržavy jak rehulatara, što stvoryć absalutna inšyja ekanamičnyja ŭzajemasuviazi…» — pačaŭ čynoŭnik.

«Heta pryvatyzacyja?» — pierapytali ŭ jaho.

«Nie. Heta nie pryvatyzacyja, a padzieł funkcyj, abaviazkaŭ, kirunkaŭ i pryncypaŭ dziejnaści ministerstvaŭ, kancernaŭ i abłvykankamaŭ», — skončyŭ Snapkoŭ.

Druhoj nieabchodnaj reformaj jon bačyć «farmiravańnia dziaržaŭnaha indykatyŭnaha prahnozu». Ciapier ahulny płan vystaŭlaje dziaržava, a treba płanavańnie ad kožnaj biznes-adzinki, kamu, kudy i kolki pradać, patłumačyŭ Snapkoŭ. A dziaržava, maŭlaŭ, budzie zabiaśpiečvać umovy dla vykanańnia hetych drobnych prahnozaŭ.

Čytajcie taksama. Kirył Rudy: Čamu reformy nie atrymajucca (u Biełarusi ŭ 2016 hodzie)

• 0
• 0
• 0
• 0
• 0
• 0
• 0
• 0