Alaksandr Łukašenka svoj pieršy paśla prezidenckich vybaraŭ vizit maje namier ździejśnić u Rasiju pa zaprašeńni Uładzimira Pucina.
Pra heta išła razmova 16 listapada padčas sustrečy kiraŭnika Biełarusi z Nadzvyčajnym i Paŭnamocnym Pasłom Rasii ŭ Biełarusi Alaksandram Surykavym.
Biełaruski lidar padziakavaŭ za zaprašeńnie naviedać Rasijskuju Fiederacyju z aficyjnym vizitam. «Heta pravilna budzie, što paśla prezidenckich vybaraŭ u Biełarusi, jak zvyčajna, ja naviedvaju nie čužuju mnie Rasiju, jak by kamuści nie padabałasia. Dumaju, heta budzie pravilna, i heta adkaz na mnohija pytańni», — miarkuje Łukašenka.
Jon padkreśliŭ, što «hatovy da surjoznaj hutarki na temu biełaruska-rasijskich adnosin». Kiraŭnik dziaržavy adznačyŭ, što pa linii Biełaruś—Rasija adbudziecca šerah mierapryjemstvaŭ u dvuchbakovym farmacie. «Miarkuju, što i ŭ šmatbakovym farmacie budziem sustrakacca ź inšymi prezidentami», — zaŭvažyŭ taksama Alaksandr Łukašenka.
«Jość pra što pahavaryć, i adkryta pahavaryć, kab u nas nie było nijakich niedamovak», — praciahnuŭ Łukašenka. Jon adznačyŭ, što hatovy da adkrytaj i surjoznaj hutarki. «Davajcie adkryta abmiarkujem našy i prablemnyja pytańni, kali jany jość, i paznačym pierśpiektyvu», — skazaŭ jon.
Alaksandr Łukašenka ličyć, što da majučaj adbycca sustrečy z prezidentam Rasii možna budzie padkarektavać niekatoryja kirunki dvuchbakovaha supracoŭnictva z tym, «kab źniać niekatoryja naściarožanaści». Razam z tym jon zaŭvažyŭ, što nie bačyć tut asablivych prablem.
U svaju čarhu Alaksandr Surykaŭ padziakavaŭ Łukašenku za toje, što jon pryniaŭ zaprašeńnie naviedać Rasijskuju Fiederacyju z aficyjnym vizitam.
«My ŭdziačnyja, što heta budzie Vaš pieršy vizit paśla prezidenckich vybaraŭ mienavita ŭ Rasijskuju Fiederacyju. Dumaju, što kali jość šurpataści (a zaŭsiody jość niejkija šurpataści va ŭzajemaadnosinach dźviuch krain, navat samych blizkich), to padčas hetaj sustrečy jany buduć urehulavany i znojduć naležnaje razumieńnie», — pierakanany pasoł Rasii.
