Аляксандр Лукашэнка свой першы пасля прэзідэнцкіх выбараў візіт мае намер здзейсніць у Расію па запрашэнні Уладзіміра Пуціна.
Пра гэта ішла размова 16 лістапада падчас сустрэчы кіраўніка Беларусі з Надзвычайным і Паўнамоцным Паслом Расіі ў Беларусі Аляксандрам Сурыкавым.
Беларускі лідар падзякаваў за запрашэнне наведаць Расійскую Федэрацыю з афіцыйным візітам. «Гэта правільна будзе, што пасля прэзідэнцкіх выбараў у Беларусі, як звычайна, я наведваю не чужую мне Расію, як бы камусьці не падабалася. Думаю, гэта будзе правільна, і гэта адказ на многія пытанні», — мяркуе Лукашэнка.
Ён падкрэсліў, што «гатовы да сур'ёзнай гутаркі на тэму беларуска-расійскіх адносін». Кіраўнік дзяржавы адзначыў, што па лініі Беларусь—Расія адбудзецца шэраг мерапрыемстваў у двухбаковым фармаце. «Мяркую, што і ў шматбаковым фармаце будзем сустракацца з іншымі прэзідэнтамі», — заўважыў таксама Аляксандр Лукашэнка.
«Ёсць пра што пагаварыць, і адкрыта пагаварыць, каб у нас не было ніякіх недамовак», — працягнуў Лукашэнка. Ён адзначыў, што гатовы да адкрытай і сур'ёзнай гутаркі. «Давайце адкрыта абмяркуем нашы і праблемныя пытанні, калі яны ёсць, і пазначым перспектыву», — сказаў ён.
Аляксандр Лукашэнка лічыць, што да маючай адбыцца сустрэчы з прэзідэнтам Расіі можна будзе падкарэктаваць некаторыя кірункі двухбаковага супрацоўніцтва з тым, «каб зняць некаторыя насцярожанасці». Разам з тым ён заўважыў, што не бачыць тут асаблівых праблем.
У сваю чаргу Аляксандр Сурыкаў падзякаваў Лукашэнку за тое, што ён прыняў запрашэнне наведаць Расійскую Федэрацыю з афіцыйным візітам.
«Мы ўдзячныя, што гэта будзе Ваш першы візіт пасля прэзідэнцкіх выбараў менавіта ў Расійскую Федэрацыю. Думаю, што калі ёсць шурпатасці (а заўсёды ёсць нейкія шурпатасці ва ўзаемаадносінах дзвюх краін, нават самых блізкіх), то падчас гэтай сустрэчы яны будуць урэгуляваны і знойдуць належнае разуменне», — перакананы пасол Расіі.
Каментары