Barysaŭski BATE pravioŭ apošni sioleta chatni matč hrupavoha etapa Lihi čempijonaŭ. U hości da našych chłopcaŭ pryjechaŭ niamiecki «Bajer». Pieršaja hulnia hetych kamand u vieraśni ŭ Levierkuzienie skončyłasia adčuvalnaj poŭchaj dla BATE — 1:4.
«Bajer» usio jašče cieplić nadzieju na vychad u 1/8 finała Lihi čempijonaŭ, tamu nijakaj niedaacenki być nie mahło. Niemcy pryjechali ŭ Barysaŭ tolki z adnoj metaj — pieramahać.
Jašče za paru chvilin da pačatka trybuny zieŭrali pustotami. Mabyć, zaŭziatary stajali ŭ čerhach pa ciopły čaj i chot-dohi, kab sahrecca ŭ hety chałodny viečar. Sa śvistkom sudździ ab pačatku hulni trybuny zapoŭnilisia amal całkam.
Darečy, chot-dohi na futbole kaštavali až 35 tysiač. Heta vam nie vybary.
Hulnia dla BATE pačałasia lepš nie prydumaješ. Užo na 2-j chvilinie Michaił Hardziajčuk udaryŭ u bok varot «Bajera». Miač nie toje, kab chutka lacieŭ, ale zakaciŭsia ŭ varoty akurat pamiž noh hałkipiera. Strašny son varatara – 1:0.
BATE dobra hladzieŭsia ŭ pieršym tajmie, choć i nie nadta časta pahražaŭ supierniku ŭdarami. U centry pola vydatny matč vydaŭ Alaksandr Hleb. Naš vieteran, jak u maładości, radavaŭ hledačoŭ niepaŭtornymi fintami i abvodkami. Na žal, partniory nie zaŭsiody paśpiavali za dumkami Hleba.
Asobny dziakuj za hulniu varta skazać hałkipieru BATE Siarhieju Černiku. Uradženiec Mastoŭskaha rajona niekalki razoŭ vyratoŭvaŭ u, zdavałasia b, samych bieznadziejnych situacyjach. Matč z «Bajeram» Černik śmieła moža zanosić u svoj aktyŭ.
Mabyć, nie vypadaje jaho vinavacić u adzinym prapuščanym miačy. Składvałasia ŭražańnie, što hulec zbornaj Šviejcaryi Admir Miechmiedy chutčej naviešvaŭ na supraćlehły fłanh, a nie biŭ pa varotach, ale miač pa-zdradnicku šmyhnuŭ u kut — 1:1.
U pryncypie, toj hoł «aśpirynavych» byŭ spraviadlivym. Bo na druhi tajm «Bajer» vyjšaŭ z zusim inšym nastrojem. Nacelenyja na varoty ataki čaściakom stavili ŭ tupik našu abaronu.
Paśla zabitaha miača niemcy nie supakoilisia. Jany bačyli dla siabie tolki adzin prymalny vynik — pieramohu. U suviazi z hetym stali pavialičvacca razryvy pamiž atakaj i abaronaj. Adnojčy heta moh skarystać śviežy Niamańja Nikalič, ale tak i nie nanios udar pa varotach.
Naprykancy hulni «Bajer» stvaryŭ jašče niekalki niebiaśpiečnych momantaŭ, ale tak ich i nie skarystaŭ — 1:1.
Nastupny matč BATE praviadzie 9 śniežnia ŭ Rymie suprać «Romy».
Kamientary