Adnymi z samych niebiaśpiečnych tavaraŭ źjaŭlajucca prypravy i śpiecyi, paviedamili BiełaPAN u pres-słužbie Dziaržstandarta.
Siarod ich roznyja i vidy i handlovyja marki — kurkuma, kary, pryprava dla ryby i šašłyka ad «Vkusmastiera», kary ad Papry, pryprava dla śvininy «Pripravka», pryprava Degusta z kropam Vitpol, chmieli-suneli «7 blud», čorny mołaty pierac «Pripravka» i «Estietika vkusa» vytvorčaści Polščy, Rasii i Ukrainy. Impratavali ich staličnyja TDA «Saturn-2», PP «Praśpieryci», TAA «Avałonhandal», TAA «Dobrada».
Za apošnija try miesiacy byŭ zabaronieny ŭvoz i abaračeńnie na rynku bolš za dziasiatak najmieńniaŭ hetaj pradukcyi. Taksama spyniena abo prypyniena dziejańnie dekłaracyj, jakija paćviardžajuć adpaviednaść hetych tavaraŭ patrabavańniam techničnaha rehłamientu Mytnaha sajuza «Ab biaśpiecy charčovaj pradukcyi» (TR MS 021/2011).
Niebiaśpiečnyja prypravy byli vyjaŭleny Homielskaj, Mahiloŭskaj i Hrodzienskaj abłasnymi inśpiekcyjami Dziaržstandarta ŭ chodzie nahladnych mierapryjemstvaŭ. Pa vynikach vyprabavańniaŭ adabranych uzoraŭ, praviedzienych u akredytavanych vyprabavalnych łabaratoryjach, amal va ŭsich prypravach była ŭstanoŭlena nieadpaviednaść patrabavańniam da mikrabijałahičnych pakazčykaŭ: značnaje pieravyšeńnie norm pa kolkaści mikraarhanizmaŭ, ćvili i bakteryj hrupy kišačnaj pałački.
Siarod pryčyn parušeńniaŭ u Dziaržstandarcie nazyvajuć jakaść syraviny, što pastaŭlajecca ŭ asnoŭnym z krain Paŭdniova-Uschodniaj Azii, niedastatkovy ŭzrovień sanitarna-hihijeničnaha stanu vytvorčaści i schiem kantrolu mikrabijałahičnych pakazčykaŭ.
«Tyja imparciory, u jakich naładžany ŭstojlivyja suviazi z vytvorcami prypraŭ i śpiecyj i jakija majuć pramyja kantrakty na pastaŭku hetaj pradukcyi, nieadkładna adreahavali na vydadzienyja pradpisańni, starajucca ŭ karotkija terminy ŭstaranić parušeńni, — prakamientavaŭ načalnik adździeła dziaržaŭnaha nahladu i kantrolu Dziaržstandarta Ihar Busiel. — Jany infarmujuć kamitet ab ukaranieńni pracedur pa poŭnym abiezzaražvańni ŭvachodnaj syraviny, arhanizacyi ŭvachodnaha kantrolu partyj prypraŭ na adpaviednaść mikrabijałahičnym pakazčykam u akredytavanych vyprabavalnych łabaratoryjach».
Pa vynikach prymianieńnia pradpisańniaŭ ab zabaronie ŭvozu i abaračeńnia niebiaśpiečnych prypraŭ i śpiecyj, a taksama ab spynieńni (prypynieńni) dziejańnia na terytoryi krainy dekłaracyj ab adpaviednaści na ich była abmiežavana realizacyi pradukcyi na sumu bolš za miljard rubloŭ. «Situacyja adnosna hetaj hrupy tavaraŭ znachodzicca pad pastajannym kantrolem Dziaržstandarta. Našy abłasnyja inśpiekcyi pradoŭžać ažyćciaŭlać za joju vybaračny nahlad», — paviedamiŭ Busiel.
Kamientary