Učora Alaksandr Łukašenka palacieŭ u Rasiju ź pieršym aficyjnym vizitam.
Voś videa jaho sustrečy ŭ maskoŭskim aeraporcie.
Jak paviedamlaje jaho pres-słužba, jon «praviadzie siońnia pieramovy z prezidentam Rasii Uładzimiram Pucinym u vuzkim i pašyranym składach. Čakajecca, što ŭ centry ŭvahi budzie znachodzicca šyroki śpiektr pytańniaŭ dvuchbakovych adnosin i mižnarodnaha paradku dnia, uzajemadziejańnia ŭ intehracyjnych abjadnańniach. Pa vynikach zapłanavana padpisańnie mižnarodnych dakumientaŭ».
Siońnia ž u Minsk z tryumfam viartajecca nobieleŭskaja łaŭreatka Śviatłana Aleksijevič.
Jana vierniecca samalotam sa Stakholma, što pryziamlicca ŭ minskim aeraporcie ŭ 16:35 (rejs B2_856, mierkavana siektar 3-4).
Raniej u sacyjalnych sietkach uźnik navat śpiecyjalny ruch, kab hodna sustreć u aeraporcie nobieleŭskuju łaŭreatku. Praŭda, jaje siabroŭka Julija Čarniaŭskaja papiaredžvaje ŭ svaim fejsbuku:
«Darahija siabry, jakija źbirajucca sustrakać Śviatłanu Aleksijevič u aeraporcie. Vielizarnaja prośba. Jana budzie vielmi rada sustrečy i vielmi kranutaja vašaj inicyjatyvaj. Ale ŭ Šviecyi (tam choładna i viecier) jana prychvareła, mocna prastudziła ščaku, i ciapier ščaka balić. Tamu Śviatłana prosić nie kidacca jaje abdymać i całavać z usim zapałam lubovi i padziaki, i trymać mikrafony dalej ad jaje tvaru (nie sakret, što mnohija ich prosta sovajuć ŭ rot intervjujavanamu). Jana budzie vielmi ŭdziačnaja za razumieńnie».
U Šviecyi Śviatłanu Aleksijevič vitaŭ sam karol, chto ź biełaruskich čynoŭnikaŭ voźmie na siabie śmiełaść pryvitać jaje ŭ Minsku, fota Reuters.
