U piatnicu ministar zamiežnych spravaŭ Polščy Radasłaŭ Sikorski zajaviŭ, što apłocić Biełsatu košt zabranaha biełaruskaj milicyjaj abstalavańnia. Pra hety jahony žest paviedamlali srodki masavaj infarmacyi.
— Pavodle papiarednich raźlikaŭ, dapamoha składzie 50—70 tysiač złotych (25—30 tysiač dalaraŭ), — skazaŭ presavy sakratar MZS Piotar Paškoŭski.
Adnak u toj samy dzień na piśmovy stoł člena praŭleńnia Polskaj televizii (TVP) Słavamira Siŭka loh list, datavany 17 sakavika, u jakim MZS paviedamlaje, što vyłučaje sioleta Biełsatu na 3 miljony złotych (kala 1,4 miljona dalaraŭ) mieniej, čym planavałasia: 18 miljonaŭ złotych (8 miljonaŭ dalaraŭ) zamiest 21 miljona złotych — i heta kančatkovaja suma.
Košt dziejnaści Biełsatu sioleta aceńvaŭsia ŭ sumu kala 27 miljonaŭ złotych. Akramia hrošaj z MZS, čakałasia, što 6 miljonaŭ vyłučać zamiežnyja partnery. Na pytańnie pra pryčyny źmianšeńnia finansavańnia kanału MZSam, Piotar Paškoŭski adkazaŭ tolki: «Ja nia ŭ kursie».
Kab rabić kanał dla Biełarusi pry źmienšanym biudžecie, TVP budzie vymušanaja pajści na skaračeńnie času tranślacyi.