Atrymać žadany dakument moža absalutna luby žychar Biełarusi. Hałoŭnaje, mieć u svajactvie palaka, abo taho, chto mieŭ polskaje hramadzianstva.
Zakon ab «Karcie palaka» ŭvajšoŭ u siłu 31 sakavika.
«Siońnia byli pryniaty pieršyja pakiety dakumientaŭ ad tych, chto chacieŭ by atrymać «Kartu palaka», — skazała M.Sadkoŭska. — Razhladać dakumienty i prymać rašeńnie budzie konsuł. Na heta jamu dadziena 14 dzion, ale ŭ vypadku nieabchodnaści termin razhladu dakumientaŭ moža być padoŭžany».
Pavodle słoŭ pradstaŭnicy pasolstva, atrymać kartu moža asoba, jakaja vałodaje polskaj movaj na bazavym uzroŭni, maje ŭ svajactvie palaka abo taho, chto mieŭ polskaje hramadzianstva (baćka, maci, babula, dziadula, prababula, pradzied). Karta sapraŭdnaja na praciahu 10 hadoŭ z dnia vydačy i pry najaŭnaści adpaviednaj zajavy padaŭžajecca na nastupnyja 10 hadoŭ.
Jak raniej paviedamlaŭ BiełaPAN, uładalnik karty maje prava: atrymać doŭhaterminovuju šmatrazovuju vizu na znachodžańnie ŭ Polščy; lehalna pracavać na terytoryi Polščy biez dazvołu na pracu; zajmacca pradprymalnickaj dziejnaściu naroŭni z polskimi hramadzianami; u pieršačarhovym paradku pretendavać na finansavyja srodki, što vydzialajucca dla padtrymki palakaŭ za miažoj ź dziaržaŭnaha abo miascovaha biudžetu (na ŭzroŭni hminy); prajazdžać pa čyhuncy z 37‑pracentnaj skidkaj.
Ministerstva zamiežnych spraŭ Biełarusi nieadnarazova vystupała suprać hetaha zakona. U pryvatnaści, pres‑sakratar MZS Andrej Papoŭ 7 lutaha zajaviŭ, što realizacyja zakona «Karta palaka» ŭ jaho ciapierašniaj redakcyi «zdolnaja surjozna destabilizavać mižnacyjanalnyja znosiny ŭ našaj krainy, vyklikać napružanaść u biełaruskim hramadstvie, parušyć jaho stabilnaść i naradzić niedavier pamiž biełaruskimi hramadzianami roznych nacyjanalnaściej».
«Dla pieravodu dyjałohu ŭ kanstruktyŭnaje rečyšča» Biełaruś prapanavała Polščy «vyjści z sumiesnaj adozvaj u kampietentnyja mižnarodnyja struktury, uklučajučy Vieniecyjanskuju kamisiju Savieta Jeŭropy, z prośbaj ab praviadzieńni niezaležnaj jurydyčnaj ekśpiertyzy zakona «Karta palaka» na priedmiet jaho adpaviednaści mižnarodnym normam». Da atrymańnia takoha zaklučeńnia Biełaruś prapanavała ŭvieści maratoryj na prymianieńnie zakona ŭ dačynieńni da biełaruskich hramadzian.
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary