Sakratar Centralnaj kamisii pa vybarach i praviadzieńni respublikanskich refierendumaŭ Biełarusi Mikałaj Łazavik ličyć kanstruktyŭnymi prapanovy ab\jadnanych demakratyčnych sił (ADS) pa ŭdaskanaleńni vybarčaha pracesu. Pra heta jon zajaviŭ 7 krasavika ŭ intervju BiełaPAN.
Nahadajem, 31 sakavika ADS prezientavali šeść prajektaŭ pastanoŭ Centrvybarkama pa ŭdaskanaleńni vybarčaha pracesu. Dakumienty zakranajuć nastupnyja pytańni vybarčaha zakanadaŭstva: praces farmiravańnia vybarčych kamisij; vyłučeńnie naziralnikaŭ i ich pravy; pracedura padliku hałasoŭ; praviadzieńnie publičnaj ahitacyjnaj kampanii, a taksama ahitacyi ŭ ŚMI; kankretyzacyja zakanadaŭstva, jakoje tyčycca dziejnaści členaŭ vybarčaj kamisii. Na pres-kanfierencyi ŭ Minsku namieśnik staršyni ruchu "Za Svabodu" Viktar Karniajenka zajaviŭ, što "ADS dajuć uładam šanc pravieści vybary, vyniki jakich byli b pryznany mižnarodnaj supolnaściu".
M. Łazavik paviedamiŭ, što prajekty pastanoŭ pastupili ŭ Centrvybarkam u kancy minułaha tydnia. "Biehłaje znajomstva ź imi dazvalaje zrabić vysnovu, što asnoŭnaja častka prapanoŭ kanstruktyŭnaja", — padkreśliŭ jon.
Sakratar Centrvybarkama paviedamiŭ, što vyvučeńniem prajektaŭ dakumientaŭ zajmajecca jurydyčny adździeł Centralnaj kamisii. U pryvatnaści, im buduć zrobleny vysnovy ab adpaviednaści pałažeńniaŭ prajektaŭ vybarčamu zakanadaŭstvu, Kanstytucyi Biełarusi.
M.Łazavik zaznačyŭ, što padčas pracy pa pryniaćci pastanoŭ Centrvybarkam "budzie ŭvažliva razhladać i prapanovy ADS".
