 |
U śpisie pytańniaŭ dla praktykantaŭ paznačana: «U pracesie prachodžańnia praktyki vam daviadziecca adkazać na šerah pytańniaŭ, jakija raskryvajuć charaktar i ŭzrovień raźvićcia zamiežnych kantaktaŭ u prymajučaj arhanizacyi. U metach atrymańnia praŭdzivaj infarmacyi nie rekamiendujecca adkryvać detali zadańnia, jakoje budziecie vykonvać, supracoŭnikam prymajučaj arhanizacyi».
Aŭtar pytańniaŭ zahadčyk kafiedry palitałohii i mižnarodnych adnosinaŭ fakulteta mižkulturnych kamunikacyjaŭ Viačasłaŭ Babrovič zapeŭniŭ, što nijakaha ideałahičnaha padvochu tut niama. Pa jaho słovach, meta pytańniaŭ — nie vyviedać infarmacyju, a daviedacca, jak student umieje analizavać. A robicca heta tajemna, bo supracoŭnikam arhanizacyi moža nie spadabacca, što ich aceńvaje niejki student.
Viačasłaŭ Babrovič: «Moža być, chtości šukaje ŭ hetym zadańni žadańnie ŭstalavać ideałahičny kantrol. Nie! Nam treba było pasprabavać dać choć štości bolš‑mienš pradmietnaje studentam. Tamu my prapanavali im pahladzieć krytyčnym pohladam na toje asiarodździe, dzie jany buduć. Kaniečnie, nie ŭsim tam, na miescach, budzie pryjemna daviedacca, što chtości, asabliva z maładych, budzie ich voś tak aceńvać. Tamu i skazali: vy nie abaviazanyja raskazvać im pra hetuju pracu».
Student piataha kursa Valeryj prachodziŭ praktyku ŭ tavarystvie «Dzieci ŭ biadzie». Na pytańni jon adkazvaŭ. Kiraŭnik arhanizacyi pra heta viedaŭ, adnak praktykant nie dakładaŭ jamu pra sutnaść adkazaŭ.
Valeryj: «Ja na ŭsie hetyja pytańni adkazvaŭ tam, dzie prachodziŭ praktyku, to bok, u tavarystvie «Dzieci ŭ biadzie». My ž tam pastajanna ź niemcami ŭ kantakcie siadzieli. Jany pryjazdžali. I ja pastajanna ź imi štości biehaŭ. I voś na asnovie taho, što ja pabačyŭ, pačuŭ, jak razmaŭlaŭ ź imi, mnie dali takoje zadańnie — adkazać na hetyja pytańni».
Pytańni dazvalajuć raskryć infarmacyju ab pastajannych kantaktach z zamiežnymi partniorami arhanizacyi, vyjavić zacikaŭlenaść supracoŭnikaŭ da raźvićcia zamiežnych suviaziaŭ, palityki, ich źniešniepalityčnyja pryjarytety i zaanhažavanaść. Taksama studentam treba było paznačyć, ź jakich krynicaŭ supracoŭniki arhanizacyi atrymlivajuć palityčnuju infarmacyju: Internet, dziaržaŭnyja, niedziaržaŭnyja ŚMI.
Usie adkazy na pytańni studenty zdavali na kafiedru razam sa spravazdačaj ab praktycy. Adnak nijakaj zvarotnaj suviazi na svaju pracu jany nie atrymali. Piacikurśnik Valeryj ličyć, što, vierahodna, hetyja adkazy na fakultecie navat nie čytali:
Valeryj: «Hetyja adkazy my potym zdavali razam z praktykaj. Prosta prymacoŭvali hetuju papierku i addavali. U nas usio heta tak prajšło — nichto ničoha nie hladzieŭ».
Aŭtar pytańniaŭ Viačasłaŭ Babrovič zapeŭniŭ Jeŭraradyjo, što za 2 hady isnavańnia takoj praktyki adkazy byli vyklučna dla navučalnych metaŭ i nidzie akramia kafiedry nie vykarystoŭvalisia.
