Finalisty biełaruskaha adboru na Jeŭrabačańnie-2016. Chto jany?
Užo siońnia a 22:00 na telekanale «Biełaruś-1» i «Biełaruś-24» pačniecca tranślacyja ź finału biełaruskaha adboru na Jeŭrabačańnie. Kožny biełarus padčas konursu zmoža prahałasavać, dasłaŭšy paradkavy numar udzielnika praz SMS na numar 2883 abo patelefanavaŭšy na numar 8-810-101-05 + numar udzielnika. Jak zajavili arhanizatary, upieršyniu mienavita hledačy vyrašać, chto ž pajedzie na Jeŭrabačańnie-2016 ad Biełarusi. Praŭda, u minułym vyjaŭlałasia, što na BT hałasy nasamreč nie ličać, a pišuć patrebnyja kamuści ličby.
Takim, čynam…
1. Alaksiej Hros – «Flame» («Połymia»)
Alaksiej naradziŭsia ŭ 1989 hodzie ŭ horadzie Salihorsku. Skončyŭ muzyčnuju škołu ŭ kłasie ŭdarnych. Niejki čas vystupaŭ u składzie Salihorskaha duchavoha arkiestra. U peŭny momant Alaksieja zaŭvažyli i prapanavali vučobu ŭ Minskim dziaržaŭnym kaledžy mastactvaŭ.
U 2012 hodzie Alaksiej prajšoŭ kastynh u pradziusarski centr «Spamaš», jaki dahetul dapamahaje jamu ŭ raźvićci solnaj karjery.
U 2013 hodzie Alaksiej užo sprabavaŭ pieramahčy na finale biełaruskaha adboru, ale tady jamu nie ŭdałosia. Na jaho rachunku 8 piesień. Na konkursie jon prezientuje novy trek pad nazvaj «Flame», što ŭ pierakładzie aznačaje «Połymia».
2. Alaksandra Zacharyk – «Glory Night» («Noč źziańnia»)
Alaksandra Zacharyk naradziłasia ŭ Minsku 8 studzienia 1989 h. Z šaści hadoŭ zachaplajecca muzykaj. Skončyła muzyčnuju škołu pa kłasie fartepijana. U 12 hadoŭ pačała prafiesijna zajmacca vakałam. Svaju pieršuju pieśniu napisała ŭ 14 hadoŭ.
U 2009 brała ŭdzieł u finale piesiennaha konkursu «JeŭraFest» u składzie hrupy «Viecier u hałavie».
Da svajoj pieśni Alaksandra sama napisała muzyku. Trek nazyvajecca Glory Night («Noč źziańnia»).
3. Valeryja Sadoŭskaja – «Not alone» («Nie adna»)
18-hadovaja Valeryja naradziłasia ŭ Navahrudku. Skončyła muzyčnuju škołu ŭ kłasie pijanina. U 16 hadoŭ udzielničała ŭ TB-konkursie «Śpieŭnyja harady», vyjšła ŭ finał telešou «Hołas Ukrainy». U 2014 hodzie stała pieramožcaj biełaruskaha telešou «Akademija talentaŭ».
Muzyku dla svajoj pieśni «Not Alone (Nie adna)» napisała sama.
4. Hurt «Radyjochvala» — «Nie durej»
Pop-rock, soul i funk hurt. Tak jany sami siabie charaktaryzujuć. Hurt byŭ stvorany tolki ŭ listapadzie 2015-ha. Udzielnika hurtu raniej vystupali jak kavier-bend. U sacyjalnych sietkach ludzi padkreślivajuć padobnaść z ukrainskim śpievakom Ivanam Dornam.
Sa svajoj adnoj ź niešmatlikich piesień hurt i vystupić na adbory Jeŭrabačańnia.
5. The EM – «Turn Around» («Azirnisia»)
Jašče adzin hurt, jaki byŭ stvorany śpiecyjalna dla Jeŭrabačańnia. Jaho ŭdzielniki — Michaił i Jahor. U intervju hurt raspavioŭ, što jany paznajomilisia na prajekcie «Ikona sceny». Tady pradziusar Maksim Alejnikaŭ šukaŭ zorku, jakaja b zmahła vystupić na Jeŭrabačańni. I zamiest pieramožcy konkursu, jon abraŭ mienavita ich. Jahor zaniaŭ na prajekcie druhoje miesca, a Michał – treciaje. Pa zadumcy pradziusara, jon chacieŭ zrabić ź ich biełaruskuju viersiju rasijskaha hurtu «Srebra».
Michaś ciapier vučycca ŭ kaledžy mastactvaŭ, Jahor — u BDUKM.
Pradiusar vyrašyŭ abrać dla Jeŭrabačańnia staruju pieśniu, jakuju jon napisaŭ u 16 hadoŭ.
6. Hurt «NAVI» — «Hetaja ziamla» («This land»)
Hurt NAVI — duet Arcioma Łukjanienki i Ksieni Žuk. Słuchačy ŭsprymajuć ich jak niešta śvietłaje, pryhožaje i miłahučnaje.
Arciom pracuje na radyjo, Ksienija vykładaje vakał. Razam jany pišuć pieśni na biełaruskaj i rasiejskaj movach.
Ich pieśnia na Jeŭraadbory adzinaja pa-biełarusku. Fanaty z hurtam navat zapuścili akcyju padtrymki «Ja za biełaruskuju movu na Jeŭrabačańni-2016». Ich pieśnia «Heta Ziamla» maje natchnialny charaktar, padkreślivaje jak šmat usiaho pryhožaha na ziamli.
7. Alaksandr Ivanoŭ (Ivan) — «Help you fly» («Dapamahu tabie lotać»)
Alaksandr naradziŭsia ŭ Homieli. Prasłaviŭsia svajoj tvorčaściu ŭ Rasii na telešou «Hałoŭnaja scena». Tady ž jon paznajomiŭsia z rasijskim pradziusaram Viktaram Drobyšam, jaki dapamoh jamu raźvivacca.
Letaś kamanda Drobyša prapanavała Ivanu paŭdzielničać u Jeŭrabačańni. Viktar Drobyš napisaŭ dla jaho pieśniu «Help you fly». Sam Alaksandr ličyć pieśniu nie prosta trekam, a baładaj. U hetym jon bačyć naradžeńnie jaho novaha vobrazu.
8. Nastaśsia Małaškievič — «Pray for love» («Malisia za kachańnie»)
Nastaśsia — dzieŭka nastyrnaja. Mała kamu viadoma, što jana treci raz zapar traplaje ŭ finał biełaruskaha adboru na Jeŭrabačańnie. Letaś u biełaruskim finale jana zaniała druhoje miesca.
Raniej Anastasija śpiavała ŭ kavier-bendzie «Kuraž», vykładała vakał u takich hurtoŭ jak «Ciahni-Šturchaj». Prychilniki jaje tvorčaści adznačajuć vysoki ŭzrovień vakalnaha majsterstva.
Muzyku dla svajoj pieśni na Jeŭrabačańni jana napisała sama.
9. Kirył Jermakoŭ — «Biahu da sonca» («Running to the sun»)
Kirył — udzielnik konkursu «Akademija talentaŭ» na ANT, rasijskaha muzyčnaha konkursu «Hołas» i mižnarodnaha konursu Disney — «Moj Camp Rock». U dziacinstvie śpiavak trojčy sprabavaŭ skaryć biełaruski adbor na dziciačaje Jeŭrabačeńnie, ale jamu tak i nie ŭdałosia.
U 2014 hodzie jon byŭ na bek-vakale ŭ Tea, jaki tady prezientavaŭ Biełaruś na Jeŭrabačańni. Ciapier vučycca na zavočnym adździaleńni ŭ Instytucie sučasnych viedaŭ imia A.M.Šyrokaha na fakultecie mastactvaŭ.
Kirył dapamahaŭ napisańniem muzyki dla svajoj novaj pieśni «Biahu da sonca».
10. Hurt «Napoli» — «My Universe» («Moj Suśviet»)
Trya Napoli isnuje z 2012 hoda. Za hety pramiežak času kalektyŭ zapisaŭ dziesiać pieśniaŭ, źniaŭ niekalki klipaŭ. U 2014 hodzie adzin z salistaŭ Illa Kraŭčuk zahinuŭ u vyniku bojki ŭ Dziaržynsku.
Hurt trojčy sprabavaŭ pajechać ad Biełarusi na Jeŭrabačańnie. Siońnia adna z salistak Volha Šymanskaja pradstaŭlaje hurt solna. Sama jana prafiesijna vykładaje vakał, svaju pieśniu ličyć baładaj. U svaim vystupie abiacaje vykarystoŭvać sučasnyja technałohii.
Kamientary