26 studzienia ŭ Maskvie projdzie mižnarodnaja kanfierencyja «BiełaRuski dyjałoh». Maderataram u kožnaj siekcyi vystupić palitołah Andrej Suzdalcaŭ. Sustreča budzie prachodzić na bazie Vyšejšaj škoły ekanomiki, dzie Suzdalcaŭ źjaŭlajecca namieśnikam dekana fakulteta suśvietnaj ekanomiki i suśvietnaj palityki.
«U ramkach mierapryjemstva budzie praviedzieny situacyjny analiz, zasłuchany dakłady viadomych ekanamistaŭ ab situacyi ŭ biełaruskaj ekanomicy i pierśpiektyvach ekanamičnych reformaŭ u respublicy», — havorycca na sajcie VŠE.
Źviartaje na siabie ŭvahu śpis udzielnikaŭ, u Maskvu zaprošana niamała biełaruskich apazicyjnych palitykaŭ: lidarka «Havary praŭdu» Taćciana Karatkievič, staršynia «Našaha doma» Volha Karač, kiraŭnik «Spraviadlivaha śvietu» Siarhiej Kalakin, prafsajuzny lidar Alaksandr Jarašuk.
Pryjedzie i eks-kandydat u prezidenty Jarasłaŭ Ramančuk. Źviartaje ŭvahu, što na sustrečy nie budzie ni Statkieviča, ni Sieviarynca, ni Labiedźki, ni Niaklajeva, ni Janukieviča.
Siarod astatnich haściej kanfierencyi varta adznačyć biełarusista z MHU imia Łamanosava, aŭtara paklopnickich artykułaŭ na temu Biełarusi ŭ rasijskich miedyja Bahdana Biaspalku, a taksama kiraŭnika čarnasocienskaha sajta imperiya.by, supracoŭnika Instytuta krain SND Juryja Barančyka. Narešcie, pryjedzie biełaruski ideołah, adzin z aŭtaraŭ sajta «Zapadnarus» Leŭ Kryštapovič.
Andrej Suzdalcaŭ doŭhi čas žyŭ u Biełarusi, adnak u 2006 hodzie byŭ departavany z našaj krainy «ŭ suviazi z tym, što ŭjaŭlaje saboj pahrozu nacyjanalnaj biaśpiecy Biełarusi».
