U Minsku i Breście adznačyli Dzień sabornaści Ukrainy. U piatnicu, 22 studzienia, da pomnikaŭ Tarasu Šaŭčenku ŭ hetych haradach kvietki ŭskłali pradstaŭniki ŭkrainskaj dyjaspary i supracoŭniki dypłamatyčnych ustanoŭ Ukrainy ŭ Biełarusi.
U Minsku, la pomnika Šaŭčenku ŭ Ściapanaŭskim skviery, sabralisia pradstaŭniki Biełaruskaha hramadskaha abjadnańnia ukraincaŭ «Vatra», a taksama supracoŭniki Pasolstva Ukrainy ŭ Biełarusi. Pry hetym Časovy pavierany ŭ spravach Ukrainy ŭ Biełarusi Valeryj Džyhun padkreśliŭ, što Ukraina ŭ hety składany čas vielmi vysoka cenić dobrazyčlivaje staŭleńnie ŭładaŭ Biełarusi i pradstaŭlenuju imi mahčymaść praviadzieńnia pieramovaŭ ź sieparatystami na Minskaj placoŭcy.
Valeryj Džyhun taksama pryhadaŭ, što 22 studzienia — dzień śmierci Michaiła Žyźnieŭskaha, biełarusa, jaki addaŭ žyćcio za Ukrainu. Pa jaho prapanovie prysutnyja ŭšanavali pamiać usich, chto zahinuŭ za Ukrainu, chvilinaj maŭčańnia.
U Breście kvietki da biusta Kabzara ŭskłali Hienieralny konsuł Ukrainy ŭ Biełarusi Aleh Mysik, supracoŭniki konsulstva i pradstaŭniki abłasnoj hramadskaj arhanizacyi «Ukrainski navukova-piedahahičny sajuz «Bierahinia».
Hienieralny konsuł Ukrainy ŭ Breście Aleh Mysik. Fota Kaciaryny Harajevaj, BiełTA.
Dzień sabornaści Ukrainy adznačajecca 22 studzienia. U hety dzień u 1919 h. byŭ abvieščany Akt ŭźjadnańnia Ukrainskaj narodnaj respubliki (UNR) i Zachodnie-Ukrainskaj narodnaj respubliki (ZUNR) u adzinuju ŭkrainskuju dziaržavu. Akramia taho, u hety ž dzień na hod raniej, 22 studzienia 1918 hoda, byŭ padpisany IV univiersał Ukrainskaj Centralnaj Rady, jaki abviaściŭ poŭnuju niezaležnaść UNR.
