Staršynia Biełaruskaj fiederacyi futboła Siarhiej Rumas nie ŭpeŭnieny, što ŭ nastupnym siezonie BFF zmoža paciahnuć ciapierašni abjom vydatkaŭ na praviadzieńnie nacyjanalnaha čempijanatu. Svaje aściarohi Rumas abnarodavaŭ na pasiadžeńni vykankama fiederacyi 26 studzienia.
Zhodna z zaćvierdžanym dakumientam BFF pakryje 51% vydatkaŭ na praviadzieńnie turniru ŭ vyšejšaj lizie i 67% — u pieršaj. Hrošy, pavodle słoŭ Rumasa, buduć adšukanyja z «inšych krynic» i prybytku ad «ułasnaj haspadarčaj dziejnaści».
Zajavačnyja ŭznosy dla kamand vyšejšaj i pieršaj lih zastanucca na letašnim uzroŭni: 852 młn i 120 młn rubloŭ adpaviedna. Pry hetym kamandam vyšejšaj lihi kampiensujecca 400 młn za košt sponsarskaha kantrakta BFF z «Biełarusbankam».
Jak adznačyŭ Rumas, va ŭsich dyvizijonach jość kamandy, jakija nie raspłacilisia za minuły siezon. Pavodle słoŭ Siarhieja Safarjana, siarod daŭžnikoŭ jość tyja, chto pa vynikach siezona atrymaŭ prava vystupić u vyšejšaj lizie. «Jość pytańnie, jak jany buduć prachodzić praceduru licenzavańnia», — skazaŭ Safarjan, nie ŭdakładniŭšy, idzie havorka pra «Isłač», «Haradzieju» ci «Krumkačoŭ». Jon taksama paviedamiŭ, što ŭ siezonie-2010/11 usie vydatki na praviadzieńnie čempijanatu ŭ vyšejšaj lizie pakryvalisia za košt kłubaŭ.
Licenzavańnie kamand vyšejšaj lihi pačniecca 10 lutaha, pieršaj — 20 lutaha.
Kamientary