Старшыня Беларускай федэрацыі футбола Сяргей Румас не ўпэўнены, што ў наступным сезоне БФФ зможа пацягнуць цяперашні аб'ём выдаткаў на правядзенне нацыянальнага чэмпіянату. Свае асцярогі Румас абнародаваў на пасяджэнні выканкама федэрацыі 26 студзеня.
Згодна з зацверджаным дакументам БФФ пакрые 51% выдаткаў на правядзенне турніру ў вышэйшай лізе і 67% — у першай. Грошы, паводле слоў Румаса, будуць адшуканыя з «іншых крыніц» і прыбытку ад «уласнай гаспадарчай дзейнасці».
Заявачныя ўзносы для каманд вышэйшай і першай ліг застануцца на леташнім узроўні: 852 млн і 120 млн рублёў адпаведна. Пры гэтым камандам вышэйшай лігі кампенсуецца 400 млн за кошт спонсарскага кантракта БФФ з «Беларусбанкам».
Як адзначыў Румас, ва ўсіх дывізіёнах ёсць каманды, якія не расплаціліся за мінулы сезон. Паводле слоў Сяргея Сафар'яна, сярод даўжнікоў ёсць тыя, хто па выніках сезона атрымаў права выступіць у вышэйшай лізе. «Ёсць пытанне, як яны будуць праходзіць працэдуру ліцэнзавання», — сказаў Сафар'ян, не ўдакладніўшы, ідзе гаворка пра «Іслач», «Гарадзею» ці «Крумкачоў». Ён таксама паведаміў, што ў сезоне-2010/11 усе выдаткі на правядзенне чэмпіянату ў вышэйшай лізе пакрываліся за кошт клубаў.
Ліцэнзаванне каманд вышэйшай лігі пачнецца 10 лютага, першай — 20 лютага.
Цяпер чытаюць
У Польшчы арыштавалі былога кіраўніка беларускага «Паспалітага рушэння» — пагражае 10 год за наркотыкі23
Каментары