37-hadovy ŭradženiec Biełarusi Alaksandr Rabikaŭ pryhavorany ŭ ZŠA da piaci hadoŭ turmy pa abvinavačańni ŭ machlarstvie ź viartańniem padachodnaha padatku. Takoje rašeńnie pryniaŭ fiederalny sud Misury, paviedamlaje BiełaPAN sa spasyłkaj na vydańnie St. Louis Post-Dispatch.
Biełarus pryznany vinavatym u zmovie z metaj padačy falšyvych dekłaracyj dla viartańnia padatku ad imia inšych ludziej.
Pavodle dadzienych śledstva, Rabikaŭ uzłamaŭ kamp`iutarnuju sistemu adnoj ź finansavych ustanoŭ Sient-Łuisa i atrymaŭ dostup da asabistych dadzienych jaho supracoŭnikaŭ. Hetaja infarmacyja vykarystoŭvałasia dla padrychtoŭki falšyvych padatkovych dekłaracyj, usie zvarotnyja vypłaty pa jakich ažyćciaŭlalisia na rachunki, kantralavanyja Rabikavym i jaho saŭdzielnikami, u tym liku jaho siabroŭkaj, 28-hadovaj rasijankaj Julijaj Biełamytcavaj.
Rabikaŭ pryznaŭ svaju vinu, ale śćviardžaŭ: jamu skazali, što jon atrymlivaje «niezapatrabavanyja hrošy i prablem z-za hetaha nie budzie».
Pavodle słoŭ pamočnika prakurora Toma Albusa, noŭtbuk Rabikava «byŭ pierapoŭnieny» infarmacyjaj ab piersanalnych dadzienych inšych ludziej. Prakuror taksama paviedamiŭ, što Rabikaŭ i Biełamytcava, jakaja taksama paśla pryznała svaju vinu, sprabavali źniščyć noŭtbuk u razahretaj duchoŭcy ŭ toj momant, kali ahienty Padatkovaha ŭpraŭleńnia rabili sprobu trapić u ich dom.
Paviedamlajecca, što abvinavačvanyja sprabavali atrymać zvyš 400 tysiač dołaraŭ, vykarystoŭvajučy dadzienyja bolš čym 50 čałaviek.
Pavodle źviestak St. Louis Post-Dispatch, u Rabikava byŭ vid na žycharstva ŭ ZŠA, ale, chutčej za ŭsio, jon budzie vysłany z krainy paśla adbyćcia pakarańnia. Biełamytcava znachodziłasia ŭ ZŠA pa turystyčnaj vizie.
