Centrvybarkam hatovy realizavać asobnyja rekamiendacyi BDIPČ ABSIE

Centrvybarkam Biełarusi hatovy realizavać asobnyja rekamiendacyi, što ŭtrymlivajucca ŭ finalnaj spravazdačy naziralnaj misii Biuro pa demakratyčnych instytutach i pravach čałavieka (BDIPČ) ABSIE, zroblenaj pavodle vynikaŭ prezidenckich vybaraŭ 2015 hoda, paviedamiŭ sakratar CVK Mikałaj Łazavik paśla sustrečy kiraŭnictva kamisii z dyrektaram BDIPČ Michaelem Hieorham Linkam 28 studzienia ŭ Minsku.

Sustreča doŭžyłasia krychu bolš za hadzinu.

Link, pavodle słoŭ Łazavika, vykazaŭ padziaku za dobraje supracoŭnictva padčas prezidenckaj kampanii. «Jon acharaktaryzavaŭ vynikovuju spravazdaču ŭ jakaści dakumienta, jaki nie ŭtrymlivaje siurpryzaŭ. Pa sutnaści, tam utrymlivajucca tyja ž momanty, što i ŭ papiaredniaj spravazdačy, tolki jany bolš kankretyzavanyja i detalizavanyja», — paviedamiŭ sakratar CVK.

Pry hetym Link prapanavaŭ dla kankretnaj realizacyi rekamiendacyj pravieści sustrečy ekśpiertaŭ z boku CVK i BDIPČ. Hetyja sustrečy, na jaho dumku, mohuć prachodzić jak u Minsku, tak i ŭ Varšavie. «My pahadzilisia z hetaj prapanovaj, ličym, što kankretnaje supracoŭnictva, kali čutny hołas abodvuch bakoŭ, budzie karysnym», — adznačyŭ Łazavik.

Pavodle jaho słoŭ, staršynia Centralnaj kamisii Lidzija Jarmošyna padzialiła prapanovy, jakija ŭtrymlivajucca ŭ vynikovaj spravazdačy BDIPČ, na try katehoryi. Prapanovy ź pieršaj katehoryja patrabujuć źmieny Kanstytucyi i tyčacca pašyreńnia vybarčych pravoŭ hramadzian, źmieny umoŭ vyłučeńnia kandydata ŭ prezidenty. «Realizacyja hetych rekamiendacyj patrabuje praviadzieńnia refierendumu, heta składanaja pracedura», — padkreśliŭ sakratar kamisii.

Druhaja katehoryja ŭtrymlivaje rekamiendacyi što da ŭniasieńnia papravak u zakony i Vybarčy kodeks. «Tut jość i racyjanalnyja prapanovy, ale terminy nie dazvalajuć da parłamienckich vybaraŭ ich uzvažana razhledzieć i realizavać», — skazaŭ Łazavik.

Treciaja hrupa rekamiendacyj tyčycca ŭdaskanaleńnia pravaprymianialnaj praktyki. «U hetym napramku my hatovy supracoŭničać, zrabiŭšy maksimalna mahčymaje da parłamienckich vybaraŭ. Heta pavyšeńnie prazrystaści asobnych etapaŭ vybarčaj kampanii, pašyreńnie pravoŭ mižnarodnych naziralnikaŭ u płanie atrymańnia infarmacyi, pavyšeńnie prazrystaści razhladu skarhaŭ. Hetyja pytańni možna sapraŭdy vyrašyć z dapamohaj pastanoŭ Centralnaj kamisii», — paviedamiŭ Łazavik.

Na zakančeńnie sustrečy, adznačyŭ jon, Link zajaviŭ, što, na jaho dumku, u supracoŭnictva CVK i BDIPČ «dobraja budučynia».

Link prybyŭ u Biełaruś 28 studzienia z dvuchdzionnym vizitam. U dzień prybyćcia BDIPČ apublikavała finalny dakład pavodle vynikaŭ nazirańnia za prezidenckimi vybarami, jakija prajšli ŭ Biełarusi 11 kastryčnika 2015 hoda. U im dajecca acenka minułaj kampanii, havorycca pra nieabchodnaść palityčnaj voli ŭładaŭ dla praviadzieńnia ŭsioabdymnaha pracesu reform, a taksama dajucca rekamiendacyi dla pryviadzieńnia biełaruskaha vybarčaha zakanadaŭstva ŭ adpaviednaść z abaviazacielstvami ŭ miežach ABSIE.

• 0
• 0
• 0
• 0
• 0
• 0
• 0
• 0