U vyrašalnych hulniach matču Kubka Devisa Biełaruś — Šviejcaryja veterany pojduć u boj.
U vyrašalnych hulniach matču Kubka Devisa Biełaruś — Šviejcaryja 13 krasavika za haspadaroŭ vystupiać Maksim Mirny i Uładzimir Vałčkoŭ. Pra heta paviedamiŭ žurnalistam kapitan biełaruskaj zbornaj Dźmitryj Tatur, padvodziačy vyniki pieršych dvuch dzion.
Takim čynam, Uładzimir Vałčkoŭ zamienić 17-hadovaha Uładzimira Ihnacika, jaki ŭ jakaści druhoha numara pavinien byŭ u niadzielu vyjści na kort suprać druhoj rakietki haściej Stefana Bali. D. Tatur nie staŭ adkazvać na pytańnie, čamu ŭ pieršy dzień zamiest U.Vałčkova vyjšaŭ U.Ihnacik, abmiežavaŭšysia frazaj «Ihnacik byŭ hatovy hulać». Raniej jon nazvaŭ zamienu «niečakanaj».
Paśla dvuch adzinočnych i parnaha pajadynkaŭ biełarusy ŭstupajuć ź likam 1:2. Pavodle słoŭ kapitana, byŭ praviedzieny analiz piatničnych paražeńniaŭ, u pryvatnaści niaŭdačy M. Mirnaha i U. Ihnacika ŭ hulni na taj-brejku. «Mahło być nie 0:2, a 2:0 na našu karyść», — ličyć Dz. Tatur. Matč U. Ihnacika suprać lidera šviejcarcaŭ Stanisłasa Vaŭrynki kapitan nazvaŭ «cudoŭnym». «Upieršyniu za apošnija 10—12 hadoŭ u nas źjaviŭsia taki hulec. Jon na roŭnych zmahaŭsia z hulcom pieršaj tryccatki suśvietnaha rejtynhu i, spadziajusia, jašče nie raz paraduje nas», — skazaŭ Dz. Tatur.
Pierałomnym momantam u parnaj sustrečy, jakuju haspadary vyjhrali, M. Mirny ličyć kancoŭku druhoha seta, kali pry liku 4:3 udałosia ŭziać padaču sapiernika (vynikovy lik 3:6, 6:3, 6:1, 6:2).
Na dumku lidera biełaruskaj zbornaj, šancy na ahulnuju pieramohu nie stračany: «Mnie nie pryvykać pačynać treci dzień, kali my prajhrajem. Historyja pakazvaje, što ŭ treci dzień ja hulaju dobra. Pieraśpim noč, i budziem hulać».
Jak zaznačyŭ kapitan zbornaj Šviejcaryi Sieviaryn Luci, kamanda «raźličvała ŭ ideale» vyrašyć zychod matču ŭžo ŭ subotu, adnak u sapiernikaŭ vielmi mocnaja para: «Mirny — adzin ź viadučych parnych hulcoŭ, a Vałčkoŭ cudoŭna hulaje ŭ duetach na Kubku Devisa». Adzin z udzielnikaŭ šviejcarskaj pary Iŭ Alehro pryznaŭ, što paśla vyjhranaha pieršaha seta była stračana psichałahičnaja ŭpeŭnienaść. «Heta vielmi ciažka, kali ŭvieś čas štości chočaš zrabić, a ničoha nie atrymlivajecca», — paskardziŭsia hulec.
Tym nie mienš, pavodle słoŭ kapitana zbornaj haściej, kamanda pavinna być hatova ŭziać u niadzielu pieramožnaje ačko.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2
Kamientary