Uładzimir Prakopavič byŭ u humory, šmat žartavaŭ i razdavaŭ kamplimienty haściam.
11 lipienia ŭ dvoryku Nacyjanalnaha instytuta imia Asalinskich (Ossolineum) va Urocłavie adbyłasia litaraturnaja viečaryna z nahody 80‑hodździa Uładzimira Niaklajeva. Pavinšavać sapraŭdy narodnaha paeta i piśmieńnika Biełarusi pryjšli siabry, kalehi, čytačy, a taksama Abjadnany pierachodny kabiniet Biełarusi na čale sa Śviatłanaj Cichanoŭskaj, piša Reform.news.
Uładzimir Prakopavič byŭ u humory, šmat žartavaŭ i razdavaŭ kamplimienty haściam.
Užo zaraz pa internecie raźlacieŭsia dościp ad paeta paśla vinšavalnaha pacałunku Śviatłany Cichanoŭskaj.
«Ja ŭspomniŭ, što niekali z Brežnievym całavaŭsia. Nu, ja vam skažu — zusim nie toje! — pramoviŭ tvorca i dadaŭ. — Davajcie žančyn vybirać — i budzie kaho całavać!».
Aŭtar ramanaŭ «Aŭtamat z haziroŭkaj ź siropam i biez», «Hej Ben Hinom» padziakavaŭ polskamu boku za haścinnaść i prytułak u vyhnańni.
Ad imia haspadaroŭ placoŭki ź ciopłymi słovami i vinšavańniami da paeta źviarnulisia pradstaŭniki najvyšejšaha kiraŭnictva Asalineuma — namieśnik dyrektara instytuta Hžehaž Makuch i namieśnica dyrektara pa Muziei kniazioŭ Lubamirskich Iaanna Błoch, jakija asabista pryvitali biełaruskaha tvorcu i haściej viečaryny.
U svaju čarhu viadomaja polskaja daśledčyca centralnajeŭrapiejskaj litaratury, doktar humanitarnych navuk i kiraŭnica adździeła kamunikacyj Asalineuma Katažyna Učkievič padkreśliła, što tvorčaść Uładzimira Niaklajeva asablivym čynam blizkaja polskaj kultury i zrazumiełaja miascovamu čytaču, ale razam z tym paet zastajecca nievierahodna samabytnym tvorcam, jaki adkryvaje śvietu ŭnikalny i niepaŭtorny hołas Biełarusi.
Pavinšavać naminanta na Nobieleŭskuju premiju pryjechali i ź Biełastoka. Tak, kiraŭnik Centra biełaruskaj kultury ŭ Biełastoku Anatol Vap razam sa svaim viadomym cioskam — hałoŭnym redaktaram tydniovika «Niva» i dyrektaram «Radyjo Racyja» Jaŭhienam Vapam — padaryli jubilaru karcinu z vyjavaj zubra.
Mienavita Biełastocki centr supolna z fondam Kamunikat.org vydaŭ da jubileju novuju knihu apaviadańniaŭ Niaklajeva «Śviataja krynica». Nabyć imprezavaje vydańnie i atrymać aŭtohraf paeta možna było adrazu na miescy padčas sustrečy.
Siarod haściej uračystaści byli i inšyja znakavyja postaci sučasnaj kultury — paety Andrej Chadanovič i Nasta Kudasava, inšyja tvorcy.
Kulminacyjaj imprezy stała aŭtarskaje dekłamavańnie. Uładzimir Niaklajeŭ u katory raz davioŭ, što jaho słova zdolnaje trymać i natchniać lubuju aŭdytoryju — paet byŭ «va ŭdary» i skaryŭ publiku frahmientami z paem «Pałaniez» i «Jahajła».
Zaviaršyŭsia litaraturny viečar muzyčnaj častkaj i śviatočnym tortam. Paśla imprezy da jubilara jašče vielmi doŭha stajała ščylnaja čarha achvotnych atrymać zapavietny aŭtohraf i asabista pažadać paetu doŭhich hadoŭ žyćcia.
Kamientary