50-hadovaja minčanka stała achviaraj ramantyčnaha znajomstva ŭ sacyjalnych sietkach i straciła 40 tysiač dalaraŭ.
Jak paviedamili ŭ Centralnym RUUS Minska, žančyna paznajomiłasia ŭ sacsietkach z zamiežnikam. Mužčyna raspavioŭ, što žyvie ŭ Vialikabrytanii, maje va ŭłasnaści nieruchomaść i vialiki rachunak u banku. Časta chodzić u płavańnie. Vielmi adzinoki i jamu patrebnaja spadarožnica žyćcia, jakaja zaŭsiody čakała b jaho na bierazie. Sietkavyja adnosiny raźvivalisia imkliva, i nieŭzabavie mužčyna pačaŭ zapeŭnivać žančynu, što praź niekalki miesiacaŭ, paśla taho jak jon vierniecca z čarhovaha rejsa, jany paženiacca.
Paźniej mužčyna napisaŭ, što ŭ schoviščy znachodzicca jaho majomaść, za jakuju treba apłacić strachoŭku, što sam zrabić heta nie moža, bo na bierah jon u bližejšy čas nie sydzie. Budučy «muž» paprasiŭ žančynu pieravieści na rachunak hrošy dla apłaty, što taja i zrabiła, kab dapamahčy jamu. Paźniej mužčyna paviedamiŭ, što vysłaŭ svajoj vyratavalnicy banderol z bujnoj sumaj.
Adnak praź niekatory čas joj patelefanavała dziaŭčyna, jakaja nazvałasia supracoŭnicaj mytni, i skazała, što ŭ pasyłcy vyjaŭlena 45 tysiač dalaraŭ, u suviazi z čym banderol aryštavanaja i treba zapłacić štraf. I znoŭ paciarpiełaja pieraličyła hrošy, adnak pasyłku z hrašyma ad kachanaha tak i nie atrymała. Vyśvietliłasia, što heta byŭ padman. U ahulnaj kolkaści žančyna zapłaciła bolš jak 40 tysiač dalaraŭ. Hetyja hrošy jana pazyčyła ŭ znajomych i ŭziała ŭ niekalkich bankach kredyt.
Kamientary