Minskija ŭłady majuć namier razhledzieć pytańnie ab prysvajeńni imia Tadevuša Kaściuški adnoj sa staličnych vulic. Pra heta paviedamlaje vydańnie «SB - Biełaruś siehodnia».
Partret Tadevuša Kaściuški aŭtarstva Karła Hotliba Švajkarta
Vydańnie adznačaje, što prapanovu ŭviekaviečyć imia Kaściuški, ustalavaŭšy jamu pomnik u Minsku i nazyvaŭšy imiem adnu sa staličnych vulic abo płoščaŭ, apublikavaŭ u haziecie čytač u pačatku lutaha.
U adkazie na publikacyju kiraŭnik spraŭ harvykankama Mikałaj Kotaŭ paviedamiŭ, što pytańnie ab prysvajeńni imia Kaściuški adnoj z vulic moža być razhledžanaje na bližejšym pasiadžeńni kamisii pa najmieńni i pierajmienavańni praśpiektaŭ, vulic, płoščaŭ i inšych składovych častak Minska.
Vyrab tvoraŭ manumientalnaha mastactva, pa słovach Kotava, za košt minskaha biudžetu nie praduhledžany.
«Pytańnie ab stvareńni pomnika Kaściušku metazhodna razhladać paśla najmieńnia terytoryi jaho imiem i vyznačeńnia krynic finansavańnia», — havorycca ŭ liście.
Vulicy, jakija nosiać imia Tadevuša Kaściuški, jość u Polščy, Rasii, ZŠA, Ukrainie, a taksama ŭ niekatorych biełaruskich haradach — Baranavičach, Breście, Hrodnie, Niaśvižy, Pinsku. U toj ža čas na karcie Minska imia našaha znakamitaha suajčyńnika da hetaha času niama.