Tolki dvoje ź siabroŭ palitrady vykazalisia za pieranos partyjnaha forumu na inšy termin. Usie astatnija prahałasavali za toje, kab pravodzić źjezd 20 krasavika, paviedamiŭ na presavaj kanferencyi lider AHP Anatol Labiedźka:
«My paličyli, što pieranos — heta prajava našaj słabaści. Heta aznačała b, što my idziem pa toj kanvie, jakaja padrychtavanaja dla nas źvierchu. Da taho ž pieranos aznačaŭ by novyja prablemy ź Ministerstvam justycyi. I samaje hałoŭnaje — niama nijakich harantyjaŭ, što paźniej my zmožam pravieści źjezd u novych umovach».
Prablema ź miescam praviadzieńnia źjezdu ŭźnikła paśla taho, jak Mienharvykankam dasłaŭ na adras partyi aficyjny adkaz, u jakim napisana: «Infarmujem, što vyznačeńnie miesca praviadzieńnia mierapryjemstva źjaŭlajecca abaviazkam asobaŭ, jakija adkaznyja za arhanizacyju i praviadzieńnie hetaha mierapryjemstva».
Spadar Labiedźka kaža: zvarotu pa dapamohu ŭ staličny harvykankam papiaredničali až 23 admoŭnyja adkazy z roznych ustanovaŭ, dzie partyjnaje kiraŭnictva chacieła arandavać zalu:
«Toje, što adbyvajecca, heta biesprecedentna. U historyi dačynieńniaŭ apazycyjnych partyjaŭ z režymam takoha jašče nie było. Byli prablemy, dazvoł časam davali litaralna za niekalki dzion da pačatku, ale jaho davali. Ja dumaju, toje, što adbyvajecca, — heta źviony adnaho łancuha. Spačatku padziei 25 sakavika, potym pahromy ŭ miescach, dzie pracavali niezaležnyja žurnalisty. Heta ŭsio — adno».
Palitolah Juraś Čavusaŭ zhadvaje, što niešta padobnaje ŭ sučasnaj biełaruskaj historyi ŭžo było. Prynamsi, ułady niekalki razoŭ nie davali mahčymaści pravieści źjezd Biełaruskaj sacyjał‑demakratyčnaj partyi (Hramada), kali jaje staršyniom abirali Alaksandra Kazulina:
«Tamu kazać, što adbyvajecca zusim biesprecedentnaje, ja b nia staŭ. A ŭ planie taho, što partyi nie dali pamiaškańnia? Usie viedajuć, što nieruchomaść u stalicy Biełarusi znachodzicca pad dziaržaŭnym kantrolem. I tamu ŭładaram hetych zalaŭ navat nie patrebna davać admysłovy zahad, kab jany nie davali pamiaškańnia apazycyi. Jany sami hetaha bajacca. A dośvied źjezdu Partyi BNF pakazvaje, što patrebny admysłovy zahad z administracyi, kab dali zalu».
Kamientary