U muziei-siadzibie Ahinskaha buduć raźvivać tradycyi darosłych i dziciačych balaŭ

Tradycyi darosłych i dziciačych balaŭ buduć raźvivać u muziei-siadzibie M.K. Ahinskaha ŭ Zaleśsi ŭ Hod kultury, paviedamili ŭ dyrekcyi muzieja.

Pavialičyć

Bali ŭ Zaleśsi Smarhonskaha rajona nazyvajuć brendavymi mierapryjemstvami. U minułym hodzie ŭdzielnikami kaściumiravanych tancavalnych i teatralnych viečaroŭ pažadała stać bolš ludziej, čym mahła pryniać siadziba. Na bal pryjazdžali ź Minska, Hrodna, niekatorych rajonaŭ, zamiežnyja hości. Na kaladny bal u studzieni biahučaha hoda tolki ź Litvy prybyli amal 30 haściej. U červieni ŭ siadzibie čakajuć junych udzielnikaŭ balu. Jašče adzin balny viečar płanujuć pravieści ŭ vieraśni ŭ čas śviata «Viartańnie Paŭnočnych Afin», jakoje arhanizujecca da dnia naradžeńnia byłoha ŭładalnika siadziby, suśvietna viadomaha kampazitara, palityčnaha dziejača i dypłamata Michała Kleafasa Ahinskaha.

U Hod kultury ŭ adrestaŭryravanaj siadzibie płanujuć pravieści mierapryjemstvy mižnarodnaha i miascovaha maštabu. Z najbližejšych — kancert viadomych vykanaŭcaŭ kłasičnaj muzyki z Polščy «Hdańskaje trya» 19 sakavika. Niezvyčajnym abiacaje stać «Noč muziejaŭ» u siadzibie, adnak pakul arhanizatary nie raskryvajuć sakretaŭ. Zapłanavana praviadzieńnie fiestyvalu batleječnaha mastactva, fiestyvalu «Zaleśsie źbiraje siabroŭ», viečaroŭ ramansa i kancertaŭ, kviest-hulniaŭ i inš.

Sieryju mierapryjemstvaŭ praviadzie taksama miascovy dabračynny fond «Paŭnočnyja Afiny». Na terytoryi siadziby chočuć arhanizavać zialony plener, na jaki zaprosiać fłarystaŭ, łandšaftnych dyzajnieraŭ i mastakoŭ z roznych krain. Letam dobraŭparadkavańniem parku ŭ Zaleśsi buduć zajmacca ŭdzielniki mižnarodnaha vałanciorskaha łahiera.

Muziej-siadziba kniazioŭ Ahinskich u Zaleśsi Smarhonskaha rajona adkryłasia ŭ vieraśni 2014 hoda paśla restaŭracyi, praviedzienaj pa prahramie transhraničnaha supracoŭnictva «Łatvija — Litva — Biełaruś», a taksama za košt srodkaŭ respublikanskaha i abłasnoha biudžetaŭ. Muzieju-siadzibie starajucca viarnuć byłuju słavu «Paŭnočnych Afin», jak siadzibu nazyvali raniej, - miesca, kudy pryjazdžali viadomyja dziejačy ź Pieciarburha, Maskvy, Paryža, Varšavy i inšych haradoŭ. U siadzibie Zaleśsie viadomy hramadski dziejač, dypłamat i kampazitar Michał Kleafas Ahinski žyŭ amal 20 hadoŭ (z 1802 pa 1822 hod). Tut jon stvaryŭ samy viadomy tvor — pałanez «Raźvitańnie z Radzimaj».

• 0
• 0
• 0
• 0
• 0
• 0
• 0
• 0